BAS MÚFTI QARTTAR KÚNINE ORAI QARIIaLARǴA QURMET KÓRSETTI

1 qazan – Halyqaralyq qarttar kúnine oraı Qazaqstan musylmandary dinı basqarmasy Astana qalasyndaǵy «Sharapat» áleýmettik qyzmet kórsetý ortalyǵynda qarııalarǵa arnalǵan arnaıy shara uıymdastyrdy.

Atalǵan sharaǵa Qazaqstan musylmandary dinı basqarmasynyń Tóraǵasy, Bas múftı Naýryzbaı qajy Taǵanuly qatysyp, ortalyqtaǵy qarııalardy merekemen quttyqtady.

«Alla Taǵala sizderge kúsh-qýat, uzaq ǵumyr násip etsin. Halqymyz «Qarty bar eldiń qazynasy bar» deıdi. Biz qarııasyn qurmettegen, úlkenin syılaǵan, «qarttarym – qazynam» dep baǵalaǵan elmiz.

Aq saqaldy ata men aq jaýlyqty ájeniń biz úshin orny bólek. Allaǵa shúkir, elimizde baıyrǵy babalardan kele jatqan osy bir sabaqtastyq áli kúnge óz qundylyǵyn joıǵan joq. Qarııany qurmetteý – bizdiń babalardan mıras bolǵan qasterli muramyz ispetti.

Memleketimiz de qarııalaryn árqashan qoldap keledi. Olarǵa kórsetiletin kómektiń kólemi de jyl saıyn ulǵaıýda. Bul – úlken qamqorlyq. Qazaqstan musylmandary dinı basqarmasy da óz múmkindigi aıasynda qarttarǵa qamqorlyq tanytyp keledi», – dedi Bas múftı.

Merekelik shara barysynda ortalyqtaǵy qarııalarǵa arnaıy syı-sııapattar tabystaldy. Sondaı-aq aqsaqaldar men aq jaýlyqty ájelerge qurmet kórsetilip, izgi tilekter aıtyldy.

Shara sońynda qarııalar izgi nıetin bildirip, eldiń amandyǵy men halyqtyń birligine duǵa jasady.





















​