Bas múftı qasıetti Shaǵban aıynyń kelýimen quttyqtady

26 naýryz 2020 4256 0
Оqý rejımi

Qadirli baýyrlar!

Barshańyzdy sharapaty mol Shaǵban aıynyń kelýimen shyn júrekten quttyqtaımyn!

Qasıetti Ramazan aıynyń kelgenin súıinshileıtin Shaǵbanda ár shańyraqqa shattyq, baqyt pen bereke tileımin. Alla Taǵala osy aıda jasaıtyn duǵa-tilekterimizdi, qulshylyq-ǵıbadattarymyzdy qabyl etkeı!

Ardaqty Paıǵambarymyz Muhammed (oǵan Allanyń salaýaty men sálemi bolsyn) óz úmbetine Shaǵban aıy kirgende tazalanyp, nıetimizdi durystaýdy ósıet etken.

Alla elshisiniń taǵy bir hadıs-sharıfinde aıtylǵandaı, Shaǵban aıynda jasalǵan duǵa keri qaıtarylmaıdy. Endeshe, sharapaty mol Shaǵban aıynda shynaıy nıetpen halqymyzdyń amandyǵyn surap, elimizge jetken synaqty sabyrmen jeńip shyǵýdy tilep, kóp duǵa jasaıyq.

Qurmetti jamaǵat!

Izgi ǵulamalardyń biri «Erejep – jelge, Shaǵban – bultqa, Ramazan jańbyrǵa uqsaıdy. Erejep aıynda dán egilmese, Shaǵbanda sýarylmasa, Ramazanda qandaı egin kútýge bolady» degen.

Osy aıda nıetimizdi túzep, nápil oraza ustap, múmkindiginshe tazalanyp, duǵa jasap ózimizdi qorǵaıyq. Quran oqyp, juqpaly indetke shaldyqqan jandarǵa Alladan shıpa tileıik. Óıtkeni, «Quran oqý – kóńildiń shıpasy» (hadıs).

Alla Taǵala elimizge amandyq, jerimizge tynyshtyq, halqymyzǵa bereke násip etkeı! El irgesinen jaman indetti aýlaq etip, Shaǵbannyń sharapatyna bólenýdi jazǵaı! 

Rabbym, Erejep pen Shaǵban aılaryn berekeli ete gór! Bizdi Ramazanǵa aman-esen jetkize gór! Ámın!

Naýryzbaı qajy TAǴANULY
Qazaqstan musylmandary dinı basqarmasynyń tóraǵasy, Bas múftı

Pіkіrler Kіrý