BAS MÚFTI QAZAQSTANNYŃ FINLIaNDIIa RESPÝBLIKASYNDAǴY ELShISIMEN KEZDESTI
Búgin Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly Fınlıandııa Respýblıkasyna barǵan jumys saparyn Qazaqstannyń osy eldegi Tótenshe jáne Ókiletti elshisi Azamat Sábıtulymen kezdesýden bastady.
Kezdesý barysynda taraptar sheteldegi qazaq dıasporasymen rýhanı baılanysty nyǵaıtý, dinı saýattylyqty arttyrý, sondaı-aq rýhanı-mádenı dıplomatııa baǵytyndaǵy ózara yqpaldastyq máselelerin talqylady. Bas múftı elshilik tarapynan sapardy uıymdastyrýǵa kórsetilgen qoldaý úshin alǵys bildirdi.
«Búgingi tańda sheteldegi qazaq dıasporasymen baılanys ornatý asa mańyzdy máselelerdiń biri dep sanaımyn. Ásirese, Eýropa elderinde ómir súrip jatqan qandastarymyzdyń rýhanı qajettiligine kóńil bólgen durys. Biz shet elde dinı bilim alyp jatqan qazaq jastarymen baılanys ornatý maqsatynda Mysyr, Túrkııa syndy memleketterde arnaıy resmı ókilderimizdi taǵaıyndadyq. Biz bul baǵyttaǵy jumystardy turaqty jalǵastyra beremiz. Osy oraıda biz ózińiz basqaratyn elshilikpen birlese jumys isteýge daıynbyz.Dıaspora ókilderimen kezdesýler ótkizý, jastarǵa rýhanı baǵyt berý, ulttyq jáne dinı qundylyqtardy saqtaý baǵytynda birlesken sharalar uıymdastyrýdy árdaıym qoldaımyz. Sizderdiń qoldaýlaryńyzben sheteldegi qazaq jastarynyń ana tilin, ulttyq mádenıetin jáne dástúrli dinı tanymyn saqtaý jumystary odan ári jandana túsetinine senimimiz mol. Bul – tek rýhanı emes, sonymen qatar ulttyq tutastyqty saqtaýǵa baǵyttalǵan mańyzdy is. Aldaǵy ýaqytta da ortaq maqsat jolynda birlese jumys istep, sheteldegi qazaq qaýymdastyǵyna rýhanı qoldaý kórsetý isin birge jalǵastyramyz dep oılaımyn» dedi QMDB Tóraǵasy, Bas múftı Naýryzbaı qajy Taǵanuly.
Kezdesý sońynda taraptar elshilik pen QMDB arasyndaǵy ózara úılesimdi jumysty odan ári jalǵastyrý sheteldegi qazaq dıasporasynyń ulttyq jáne rýhanı bolmysyn saqtaý isine oń yqpal etetinine senim bildirdi.
