BAS MÚFTI QURAN HATYM DUǴASYN JASADY (FOTO)

Respýblıka kóleminde ótip jatqan «Naýryznama» onkúndigi qarsańynda 21 Naýryz – Yntymaq kúnine oraı Bas múftı Naýryzbaı qajy Taǵanuly bastaǵan Qazaqstan musylmandary dinı basqarmasynyń qyzmetkerleri Qurandy hatym etip, eldiń birligi úshin duǵa jasady.

«Ýa, Alla Taǵala! Elimizge amandyq, jurtymyzǵa tynyshtyq bere gór! Otanymyzǵa, halqymyzǵa aýyzbirshilik, yntymaq bergeısiń! Qasıetti Ramazan aıyndaǵy qulshylyq-ǵıbadattarymyzdy, izgi amaldarymyzdy qabyl alǵaısyń! Jáne de osy oqylǵan Quran Hatym duǵasynyń saýabyn ómirden ótken ata-babalarymyzdyń, Alash qaıratkerleriniń, elimizdiń damýyna eren eńbegi sińgen azamattardyń rýhyna, sondaı-aq dinı salada izi qalǵan ǵalymdarymyzdyń rýhyna baǵyshtaımyz. Ámın!» dedi Bas múftı.

Budan keıin QMDB Tóraǵasy múftııat ujymyna yntymaq pen birlik jóninde nasıhat aıtyp, din jolyndaǵy, rýhanııat salasyndaǵy qyzmet arqyly elimizdiń damýyna úles qosý kerektigin jetkizdi.

​