Bas múftı Qurban aıtqa baılanysty Apparat jınalysyn ótkizdi (FOTO)
Búgin elordada Qazaqstan musylmandary dinı basqarmasynyń tóraǵasy Naýryzbaı qajy Taǵanuly Qurban aıt merekesine qatysty is-sharalardy pysyqtaý úshin arnaıy Apparat jınalysyn ótkizdi.
QMDB qyzmetkerleri Qurban aıtta uıymdastyrylatyn qaıyrymdylyq is-sharalar, aqparattyq túsindirme jumystary, pátýa berý, sanıtarlyq talaptardy saqtaý, t.b. baǵyttar boıynsha Bas múftıge baıandady.
«Qurban aıt – ısi musylmannyń ulyq meıramy. Bul meıramdy joǵary deńgeıde atap ótý úshin QMDB janynan qurylǵan jumys toby bekitilgen jospardy asqan jaýapkershilikpen tııanaqty túrde júzege asyrýy tıis. Osy baǵytta ár bólim qyzmetkeri ózine júktelgen jumysty joǵary deńgeıde uıymdastyrýy qajet», – dep atap ótti Naýryzbaı qajy Taǵanuly. Bas múftı jınalysta qurban shalý rásimi kezinde qaýipsizdik sharalarǵa jiti mán berý qajettigin sóz etti. Sonymen qatar jumys tobyna tıisti tapsyrmalar berdi.
Aıta ketsek, bıyl elimizde qurban shalý rásimi oflaın jáne onlaın formatta ótedi. Dinı basqarma el azamattaryna, ásirese qala turǵyndaryna qolaıly jaǵdaı jasaý maqsatynda qurban shalý rásimin qashyqtan ótkizýge arnalǵan qurban2022.kz saıtyn iske qosty.
Onlaın túrde qurban shalam deýshiler saıt arqyly qurbandyq malyn tańdap, kórsetilgen rekvızıtke qajetti qarajatty aýdara alady. Qoı men eshkini jeke adam, al iri qara men túıeni bir nemese 7 adam birigip shalsa bolady. Budan keıin tólem barysynda habarlamaǵa tapsyrys nómiri men qurbandyq shalýshynyń aty-jónin jazý mindetti. Qurbandyq shalynǵan soń onyń foto jáne beıne esebi tapsyrys berýshi kórsetken ýatsap nómirge jiberiledi.
