BAS MÚFTI QYZYLORDA OBLYSYNYŃ ÁKIMIMEN KEZDESTI
Syr óńirine jumys saparymen kelgen Qazaqstan musylmandary dinı basqarmasynyń Tóraǵasy, Bas múftı Naýryzbaı qajy Taǵanuly Qyzylorda oblysynyń ákimi Murat Nálqojaulymen kezdesti.
Dinbasy men aımaq basshysy óńirdegi dinı ahýal týraly suhbattasyp, alda atqarylatyn jumys baǵyttaryna toqtaldy.
«Syr óńiri – tarıhy tereń, qazaqy bolmysy saqtalǵan qasıetti ólke. Búginde elimizge adal qyzmet etip júrgen din qyzmetkerleriniń nátıjeli jumysynyń arqasynda aımaqtaǵy dinı ahýal turaqty.
Táýelsizdiktiń alǵashqy jyldarynda óńirde nebári 14 meshit bolsa, búginde olardyń sany 195-ke jetip, turǵyndardyń ıgiligine qyzmet etýde. Budan bólek, oblysta 6 meshittiń qurylysy júrgizilýde. Olardyń úsheýi bir mezette 1000-ǵa jýyq adamdy qabyldaı alady. Kásipkerlerdiń demeýshiligimen boı kóterip, búgin resmı túrde ashylǵan Tasbóget kentindegi meshit te osy qatarda. Sonymen birge Aral men Baıqońyr qalalarynda salynyp jatqan eki ǵıbadat úıi de jýyq arada el ıgiligine berilmek.
Memleket basshysy Qasym-Jomart Kemeluly óskeleń urpaqtyń rýhanı tárbıesine erekshe mán berip keledi. Búginde ókildik qyzmetkerleriniń basym bóligi – jas ári joǵary bilimdi mamandar. Bul – aımaq jastarynyń sapaly ári durys dinı aqparat alýǵa degen suranysynyń artyp kele jatqanyn kórsetedi. Búginde ákimdik pen quqyq qorǵaý organdarynyń qyzmetkerleri «Zań men tártip» qaǵıdaty aıasynda qala, aýdan jáne shalǵaı eldi mekenderdegi turǵyndar arasynda túsindirý jumystaryn turaqty júrgizedi. Jat aǵymdardyń aldyn alý jáne olarmen kúresýde tıisti sharalar uıymdastyrady.
Bul jumystardy odan ári jandandyrýda Sizderdiń qoldaýlaryńyzdyń mańyzy zor. Eki taraptyń birlesken oń bastamalary qoǵamdyq turaqtylyqty nyǵaıtyp, egemen elimizdiń birligi men tutastyǵyn saqtaýǵa berik negiz bolady dep senemin», – dedi aımaq basshysy.
Aıta keteıik, Bas múftı jumys sapary barysynda Tasbóget kentinde jańadan boı kótergen «Erbatyr ata» atyndaǵy meshittiń ashylý saltanatyna qatysyp, juma ýaǵyzyn aıtty. Sondaı-aq «Mektepke jol» qaıyrymdylyq aktsııasyna qatysyp, oblystyq meshittegi kúrdeli jóndeý jumystarymen tanysty.
