BAS MÚFTI SEZ HATShYLYǴYNYŃ XXIV OTYRYSYNA QATYSTY

Búgin Astana qalasyndaǵy Beıbitshilik jáne kelisim saraıynda Álemdik jáne dástúrli dinder lıderleri Sezi Hatshylyǵynyń XXIV otyrysy ótti.

Hatshylyq otyrysyn Qazaqstan Respýblıkasynyń Vıtse-Prezıdenti, Álemdik jáne dástúrli dinder lıderleri Sezi Hatshylyǵynyń basshysy Erlan Tynymbaıuly Qarın ashyp, Sezdiń halyqaralyq dinaralyq jáne órkenıetaralyq dıalogty damytýdaǵy mańyzyna toqtalyp, álemdik jáne dástúrli din ókilderiniń ózara túsinistik pen yntymaqtastyqty nyǵaıtýdaǵy róline nazar aýdardy.

Jıynǵa álemniń túrli elderinen kelgen din jáne halyqaralyq uıymdardyń ókilderi qatysty. Atap aıtqanda, Dúnıejúzilik musylman lıgasy Bas hatshysynyń orynbasary Abdýlrahman Abdýlla ál-Zaıd, Musylman aqsaqaldar keńesiniń Bas hatshysy Muhammed Abdelsalam, Ál-Azhar sheıhi keńsesiniń basshysy Abdýrahman Musa, Kavkaz musylmandary basqarmasynyń tóraǵasy Sheıh-ýl-ıslam Allahshúkir Pasha-zade, BUU Órkenıetter alıansynyń dırektory Nıhal Saad, Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly jáne basqa da din qaıratkerleri boldy.

Otyrysta VIII Sezd sheshimderin júzege asyrý máseleleri qaralyp, «Dinderdiń klımattyń ózgerýimen kúrestegi róli» jáne «Dinı salada jasandy ıntellektini paıdalanýdyń Etıkalyq kodeksi» atty birlesken qujattar tanystyrylyp, «Jazylmaıtyn dertke shaldyqqan balalardyń quqyqtar hartııasyn» ilgeriletý jónindegi bastama talqylandy.

Jıyn sońynda Sezd Hatshylyǵynyń XXV otyrysyn ótkizý merzimi men orny aıqyndalyp, XXIV otyrystyń hattamasy qabyldandy.

​