BAS MÚFTI ShYǴYS QAZAQSTAN OBLYSYNDA

Búgin Qazaqstan musylmandary dinı basqarmasynyń tóraǵasy Naýryzbaı qajy Taǵanuly jumys saparymen Shyǵys Qazaqstan oblysyna keldi. Bas múftı jumys saparyn Óskemen qalasyndaǵy «Ál Farabı» meshitiniń jamaǵatymen júzdesýden bastady.

Quptan namazyna jınalǵan jamaǵatpen júzdesýde Bas múftı izgilikke umtylý, qoǵamǵa paıdaly bolý jáne musylmannyń belsendi bolmysy jóninde ýaǵyz-nasıhat aıtty.

«Musylman adam jalqaýlyq pen áljýazdyqtan aýlaq bolyp, eńbekqor ári ıgi isterde belsendi bolýy qajet. Adamnyń boıyndaǵy kúsh-qýat – Jaratýshy bergen úlken nyǵmet. Bul nyǵmetti paıdaly amaldarǵa jumsaý – Allaǵa shúkirshilik bildirýdiń bir kórinisi. Sondaı-aq, kez kelgen uly isti uly maqsat alǵa jeteleıdi. Maqsaty bıik adam árekette de belsendi bolady. Tarıhta aty qalǵan uly tulǵalardyń barlyǵyn bıik maqsat jetelegen. Ardaqty Paıǵambarymyz (oǵan Allanyń salaýaty men sálemi bolsyn): «Alladan surasańdar, Fırdaýsty surańdar» dep, musylmannyń muraty bıik bolý kerektigin meńzegen», – dedi Naýryzbaı qajy Taǵanuly.

Bas múftı ýaǵyz-nasıhattan soń meshit jamaǵatymen birge quptan namazyna qatysyp, el amandyǵy úshin arnaıy duǵa jasady.

​