BAS MÚFTI SINGAPÝR MINISTRIMEN KEZDESTI (FOTO)
Búgin QMDB Tóraǵasy Naýryzbaı qajy Taǵanuly Astanadaǵy Respýblıkalyq bas meshitte Sıngapýr Respýblıkasy Premer-mınıstri keńsesiniń mınıstri, ekinshi Syrtqy ister mınıstri doktor Mohammed Osmanmen kezdesti.
Ekijaqty kezdesýde dinaralyq qatynas, tájirıbe almasý, ıslamdyq bilim berý júıesi sóz boldy. Qurmetti qonaqty jyly qarsy alǵan Bas múftı eń aldymen jańa meshitti tanystyryp, ereksheligin atap ótti.
«Elimizdegi musylmandardyń qarashańyraǵy Qazaqstan musylmandary dinı basqarmasy janynda 9 medrese kolledj, 7 qarılar ortalyǵy bar. Almaty qalasynda Nur-Múbarak ýnıversıteti bilikti mamandardy daıarlap keledi. Atalǵan oqý ornynda áıgili ál-Azhar ýnıversıtetinen kelgen birneshe ustaz dáris beredi. Qazirgi tańda respýblıka boıynsha 2700-den asa meshitimiz bar. Búgin siz kelip otyrǵan Respýblıkalyq bas meshit Ortalyq Azııadaǵy eń iri qulshylyq úıi sanalady. Qazaqstanǵa qosh keldińiz!» – dedi Naýryzbaı qajy Taǵanuly.
Óz kezeginde doktor Mohammed Osman Qazaqstanǵa tuńǵysh ret kelip otyrǵanyn aıtty. Meshittiń sáýletine tańqalǵan qurmetti qonaq QMDB Tóraǵasyna ystyq yqylasy úshin alǵys bildirdi. «Bizdiń elde Islam dini keńinen damýda. Qazirgi tańda Sıngapýr halqynyń 50 paıyzy – musylman. Biz aldaǵy ýaqytta dinı bilim berýdi keńinen qolǵa alsaq deımiz. Bul rette sizderden tájirıbe alýǵa nıettimiz. Bilikti ustazdaryńyzdy bizdiń elge jiberip, shákirt oqytý da josparda bar» dedi mınıstr.
Bas múftı sheteldik meımanǵa dástúrge saı qurmet kórsetip, qonaqkáde usyndy. Kezdesý sońynda taraptar bolashaqta birneshe baǵyt boıynsha jumys isteýge ýaǵdalasty.
