BAS MÚFTI ÚZDIK HALAL KÁSIPORYNDARDY MARAPATTADY (FOTO)
Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly Almatyda ótip jatqan «HALAL EXPO-2023» halyqaralyq kórmesiniń ashylý rásiminde úzdik halal kásiporyndardy marapattady.
«Allaǵa shúkir, Qazaqstan musylmandary dinı basqarmasy 2023 jyly 300-ge jýyq kásiporynǵa «QMDB HALAL» tańbasymen arnaıy jańa sertıfıkat tabystady. Al osyǵan deıin, Dinı basqarmadan sertıfıkat alǵan 1500-ge jýyq kásiporyn halal ónim óndirýde. Sonyń ishinde 700-ge jýyǵyn qoǵamdyq tamaqtaný oryndary quraıdy. 2022 jyly 10 myń tonnadaı ónim «QMDB HALAL» tańbasymen alys-jaqyn elderge Eksporttaldy. Osy oraıda sharıǵat talaptaryn saqtap, kópshiliktiń tutynatyn as-sýy men turmystyq zattaryna adaldyq tanytqan kásiporyndarǵa, ter tógip júrgen mamandarǵa, barsha qyzmetkerge alǵysymdy bildiremin» dedi Bas múftı.
Budan keıin QMDB Tóraǵasy «Úzdik halal kásiporyn-2023» jáne «Úzdik maman-2023» nomınatsııasy ıegerlerin saltanatty túrde marapattady.
Aıta keteıik, eki kúnge sozylatyn kórmege «QMDB Halal» tańbasymen halal ónim óndiretin otandyq kásipkerlermen birge Qyrǵyzstan men Ózbekstan, Reseı men Tatarstan, Belarýs pen Mońǵolııa, Indonezııa men Malaızııa memleketterinen kelgen 100-ge jýyq kásiporynnyń ónimderi (et, qus, sút, balyq, bal, maı ónimderi, jartylaı daıyn jáne kondıterlik ónimder, Halal kosmetıkalar, shujyqtar, BAD, taǵam qospalary, gıgıenalyq zattar, jýǵysh zattar, fast-fýdtar, balmuzdaqtar, sýsyndar, t.b.) qoıylǵan. Kórme Almaty qalasynyń «Baqshasaraı» qabyldaý úıinde ótip jatyr. Shara aıasynda semınar halal salasyna qatysty semınar-trenıngter ótedi.
