Bas múftı járdem berý jóninde juma nasıhatyn aıtty (VIDEO)
Búgin QMDB tóraǵasy, Bas múftı Naýryzbaı qajy Taǵanuly onlaın rejımde ózgege járdem berý jóninde kezekti juma nasıhatyn aıtty.
«Musylman balasynyń atqaratyn árbir isinde bereke men saýap bar. Sol saýapty isterdiń biri – ózgege járdem etý, tileýles bolý. Bireýge járdem berý, ózgeniń qamyn oılap, jaqsylyq jasaý qoǵamdaǵy ómir súrýdiń alǵy sharttarynyń biri desek te bolady. Óıtkeni adam balasy bir-birine járdemdesý arqyly ómir súredi. Iaǵnı árbir istegen istiń sońynda ózge adamdarǵa kómegi tıip jatady» deı kele Bas múftı qasıetti Quran Kárimniń «Máıda» súresindegi:
وَتَعَاوَنُوا عَلَى الْبِرِّ وَالتَّقْوَى وَلا تَعَاوَنُوا عَلَى الإثْمِ وَالْعُدْوَانِ
«Jaqsylyq pen taqýalyqta bir-birlerińe járdem berińder! Al kúná men dushpandyqta bir-birińe járdemdespeńder!» - degen aıatty tilge tıek etti.
Sondaı-aq QMDB tóraǵasy:
– Adamzat balasyna ýaqytsha berilgen ómir – ıláhı emtıhan. Oılap qaraıtyn bolsaq, árbir parasatty adam bul ómirdi kórkem túrde jáne paıdaly ótkizýdiń jolyn qarastyrady. Sahaba Ábý Bákir (Alla ol kisige razy bolsyn): «Dúnıe – múminderdiń bazary. Kún men tún – negizgi qarjysy. Izgi amaldar – saýda taýarlary. Jánnat – tapqan paıdalary. Al, tozaq – zııandary» degen.
Mine, aqyretin oılaǵan kisi amal dápterin jaqsylyqtarmen, izgi amaldarmen toltyrý úshin ómiriniń árbir sátin jemisti ótkizýge kúsh salady. Qolyna túsken túrli jaqsylyq jasaý múmkindigin Alla Taǵalanyń ıgiligi dep biledi, - dedi juma nasıhatynda.
