Bas múftıdiń úndeýine Omby musylmandar dinı basqarmasy da qoldaý bildirdi

QMDB tóraǵasy, Naýryzbaı qajy Taǵanulynyń «Biz birgemiz, tilegimiz – ortaq» atty álem musylmandaryna joldaǵan Úndeýine Omby musylmandar dinı basqarmasy da qoldaý bildiretinin jetkizdi.

Bul týrasynda Omby múftıi Bota haziret Bakýlınniń Dinı basqarmaǵa joldaǵan hatynda tolyq baıandalǵan.

«Tórtkúl dúnıege tarap, talaı adamnyń ómirin jalmap jatqan aýyr indetpen kúreste basymyzdy qosyp, bir Allaǵa minájat etýge shaqyrǵan Úndeýińizdi qabyl aldyq. Biz ımamdar jaqsylyq pen jamandyq ta Alla tarapynan ekenin bilemiz. Soǵan saı tek duǵada bolamyz. Sizdiń Ramazan aıynyń qarsańynda joldaǵan Úndeýińizge Ombydaǵy barsha musylman qoldaıdy dep senemin. Bizdiń endigi tilegimiz aýyryp jatqandarǵa Alladan shıpa surap, indettiń betin duǵamen qaıtarý. Sondyqtan qadirmendi Naýryzbaı qajy qıyn sátte tize qosyp, duǵa etýge shaqyrǵan ortaq tilegimiz qabyl bolsyn» delingen Ombydan jetken hatta.

Sonymen qatar Omby musylmandar dinı basqarmasynyń tóraǵasy Qazaq eline de amandyq tilep, duǵa etkenin jetkizipti.