«Berekeli otbasy» baıqaýynyń qorytyndysy shyqty (FOTO)

Sáýir aıynyń basynda otbasylyq qundylyqtardy, dástúrimiz ben mádenıetimizdiń dińgegi bolǵan asyl dinimizdi nasıhattaý, qasıetti Ramazan aıyna daıyndyq maqsatynda QMDB «Berekeli otbasy» respýblıkalyq ashyq otbasylyq baıqaýyn uıymdastyrǵan bolatyn.

Baıqaýǵa qatysýshy otbasylar óz paraqshalaryna #berekeliOtbasy hEsh-tegimen jáne @muftiyatkz tEgimen materıaldar júktep, baq synady. Baıqaý «Meniń otbasym», «Bizdiń súıikti meshitimiz» jáne «Úı tapsyrmasy» atty úsh týrdan turdy. Úsh týrdan da súrinbeı ótken qatysýshylar jaqynda jeńimpaz atandy. Júldeli birinshi orynǵa Taraz qalasynyń turǵyndary Baraqbaevtar otbasy ıe bolyp, otandyq shıpajaıǵa joldama aldy.

Ekinshi oryn (tońazytqysh) Qaraǵandy oblysy Osakarov aýdany Ýyzbaı selosynda turatyn Temirbekovter otbasyna buıyrdy. Al úshinshi oryndy (plazmalyq teledıdar) Túrkistan oblysy Saryaǵash aýdany Qurama aýylynyń turǵyndary Tórebekovter otbasy jeńip aldy.

Sondaı-aq baıqaýda úzdik óner kórsetken 5 otbasyǵa yntalandyrý syılyqtary berildi. Olar – Bahtııarovtar (Atyraý kalasy), Kenjebaevtar (Túrkistan oblysy Qazyǵurt aýdany Úshbulaq aýyly), Sydyqovtar (Shymkent qalasy), Myrzataevtar (Aqmola oblysy Tselınograd aýdany Qoıandy aýyly) jáne Qaıyrbekovter (Aqmola oblysy Býrabaı aýdany Shýchınsk qalasy) otbasy.

Jeńimpaz otbasylardy quttyqtaımyz! Alla berekeli qylsyn!