Braıl shrıftimen jazylǵan alǵashqy aqparattyq paraqsha aqtóbelik zaǵıptarǵa taratyldy
Aqtóbede zaǵıp jandardyń máselesin tyńdap jatqan jan joq. «Sheneýnikter pandýstan ári asa almaı júr» deıdi Aqtóbe oblystyq zaǵıptar qoǵamynyń tóraǵasy Eltaı Qylyshbaev. Aqtóbelik kózi kórmeıtin jandar alǵash ret braıl shrıftimen jazylǵan aqparattyq paraqshalardy qoldaryna aldy, dep habarlaıdy Baq.kz aımaqtaǵy tilshisi.
Aqtóbedegi zaǵıp jandardyń qolyna braıl shrıftimen jazylǵan alǵashqy aqparat paraqshasy jýyrda ǵana tıidi. Aqparattyq býklet Shymkentte jasalǵan. Kózi kórmeıtinder úshin muny QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń oblystyq departamentiniń qyzmetkerleri tapsyryspen aldyrtqan.
«Aqparattyq paraqshada memlekettik qyzmet túrleri, olardy alý sharttary, múmkindigi shekteýli azamattardyń múddeleri men quqyqtary braıl qaripterimen jazylǵan. Departament múmkindigi shekteýli jandar úshin arnaıy tapsyryspen aldyrtty. Alda aýdandarǵa da baramyz», - dedi oblystyq memlekettik qyzmet isteri jáne sybaılas jemqorlyqqa qarsy is-qımyl departamentiniń bas mamany Islam Alpysbaev.
Mundaı aqparattyq býkletter zaǵıptar júginetin ár mekemede bolýy shart. Alaıda, braıl shrıftimen qaǵazdardy shyǵaratyn kompanııalar tek Shymkent, Oral, Óskemen, Astana, Almaty qalalarynda jumys jasaıdy. Aqtóbede arnaıy tıpografııa joq. Zaǵıptar sheneýnikterdiń arbaǵa tańylǵandardyń máselesinen ári asa almaı jatqandaryna nalıdy.
"Biz sekildi soqyrlarǵa qyzmet alý yńǵaıly bolsa deımiz. Kóp qabatty turǵyn úılerde taıanysh degen bolady. Soǵan súıenip júrip kele jatsań shegeleri shyǵyp turady. SOǵan qolymyzdy jyramyz. Bizdiń sheneýnikter kóbinese pandýsty áńgimelep ketedi. Soǵan tireledi de basqasyn umytyp ketedi. Al, memlekettik qyzmet kórsetýdi aıtatyn bolsaq, Halyqqa qyzmet kórsetý ortalyǵyna barsaq, kireberiste otyratyn qyz bala qolyńa talondy ustatady da «joǵarydaǵy Ekrandy qarap otyr» deıdi. Kezegińdi kútip. Meniń kózim kórmese qalaı oǵan qarap otyramyn. «Qasyńyzdaǵy adamyńyz qaıda nemese bastyqqa bar» deıdi. Ózim áreń júrgende bastyǵyn qaıdan tabamyn",-dedi oblystyq zaǵıptar qoǵamynyń tóraǵasy Eltaı Qylyshbaev.
«Másele kóp. Qasymyzda jeke kómekshilerimiz bolǵandyqtan másele dep te qaraýǵa uıalamyz. Degenmen, saý adamdarmen birge kezekte kóp turamyz. Keıde memlekettik qyzmet ókilderinen talapqa saı qyzmet ala almaı jatasyń. Qandaı da bir qyzmetti alý úshin úlken eńbek pen qajyrdyń qajettiligi bolady. Zaǵıptarǵa kórsetiletin qyzmetti áli de damytý kerek. Jaǵdaı jasalý kerek dep oılaımyn», - deıdi «Qazaq soqyrlar qoǵamy» qoǵamdyq birlestigi korporatıvtik qorynyń prezıdenti Gúlshara Jalǵasova.
Óńirde janarynan aıyrylǵan 800-den astam 1, 2 top múgedekteri bar. Halyqqa qyzmet kórsetý ortalyǵynyń ókili Ásel Mustafınanyń sózinshe, zaǵıptar ótinish bildirse, mamandar úılerine baryp, qyzmet kórsetedi.
