Búginnen bastap meshitter jumysyna shekteý qoıylady

Búgin, 5 shildeden bastap Úkimettiń qaýlysy boıynsha eki aptaǵa karantın shekteýleri engiziledi.

Karantın kezinde birqatar nysandardyń qyzmetine tyıym salynady. Qyzmeti ýaqytsha toqtatylǵan nysandar qatarynda dinı nysandar da bar. Demek búginnen bastap eki aptaǵa deıin meshitter qaıta jabylyp, meshitterde bes ýaqyt namaz, Quran oqytý, neke qıdyrý jáne basqa da qulshylyq jasaý ýaqytsha toqtatylady. Alaıda bes ýaqyt namazǵa azan aıtý toqtatylmaıdy.

Dinı, basqa da nysandardyń qyzmetine ýaqytsha tyıym salý – juqpaly indettiń aldyn alý maqsatynda jasalyp jatqan shara. Sondyqtan úıde oqshaýlanyp, karantın talaptaryn qatań saqtap, qulshylyqtardy úıde atqaryp, sabyr saqtaýlaryńyzdy suraımyz. Sebebi ózimizge qamqorlyq – ózgelerge jasalǵan qamqorlyq.

Halqymyz qaıtadan qalypty ómir tirshiligine kóship, juqpaly indettiń jer betinen tezirek joıylýyn Alladan tileımiz! El aman, jurt tynysh bolsyn!