«Dástúr jáne otbasy» baǵyty boıynsha onlaın jınalys ótti
Qazaqstan musylmandary dinı basqarmasynyń Tóraǵasy, Bas múftı Naýryzbaı qajy Taǵanulynyń tapsyrmasymen «Dástúr jáne otbasy» baǵyty boıynsha óńirlerdegi jumystardy úılestirýge arnalǵan onlaın jınalys ótti.
Naıb múftı Sansyzbaı Shoqanovtyń tóraǵalyǵymen ótken jıynǵa QMDB «Din men dástúr» bóliminiń meńgerýshisi Marat Bektazınov, Pátýa bóliminiń mamany Medet Qursaqov, «Munara» gazetiniń dırektory Aǵabek Sydyqov jáne atalǵan baǵytqa jaýapty óńirlik qyzmetkerler qatysty.
Jıynda naıb múftı «Islam jáne adal qoǵam» jyly aıasynda bekitilgen jumys josparlarynyń oryndalýyn qamtamasyz etý, óńirlerdegi is-sharalardy júıeli uıymdastyrý jáne aılyq esepterdi belgilengen merzimde sapaly usyný qajettigin atap ótti.
Kún tártibinde qudaıy as berý kezinde ysyrapqa jol bermeý jáne toı ótkizý mádenıetin qalyptastyrý máseleleri qaraldy. Osyǵan baılanysty qoǵam qaıratkerleriniń, aqsaqaldar men qoǵamdyq keńes músheleriniń jáne meshit jamaǵatynyń qatysýymen túsindirý kezdesýlerin ótkizý, sondaı-aq toı júrgizýshilerimen nasıhat jumystaryn uıymdastyrý máseleleri talqylandy.
Bólim meńgerýshisi Marat Bektazınov meshitter janyndaǵy otbasylyq keńes berý ortalyqtarynyń qyzmetin úılestirý jáne jumysyn jandandyrý jóninde baıandady. Sharıǵat jáne pátýa bóliminiń mamany Medet Qursaqov atalǵan ortalyqtarǵa arnalǵan ádistemelik quraldy ázirleý barysy, onyń maqsaty men mazmuny týraly aqparat berdi.
«Munara» gazetiniń dırektory Aǵabek Sydyqov basylymda «Din men dástúr» arnaıy aıdaryn ashý, óńirlik jaýapty qyzmetkerlerdiń maqala ázirleý jumysyna qatysýyn arttyrý jáne medıa-josparǵa sáıkes materıaldar usyný máselelerine toqtaldy.
Jıyn qorytyndysy boıynsha jyldyq jáne aılyq josparlardyń oryndalýyn qamtamasyz etý, otbasylyq keńes berý ortalyqtarynyń qyzmetin jetildirý jáne óńirlerdegi aqparattyq-túsindirý jumystaryn kúsheıtý jóninde naqty tapsyrmalar berildi.
