«Dástúrin dáriptegen analar»atty merekelik kesh ótti (FOTO)

Nur-Sultan qalasyndaǵy «Ábý Nasyr ál-Farabı» meshitiniń «Jibek» qyz-kelinshekter klýbynyń uıymdastyrýymen «Dástúrin dáriptegen analar» merekelik keshi ótti. Naýryz merekesiniń qurmetine oraı ótkizilgen izgi sharanyń basty maqsaty — urpaǵyn salt-dástúrmen, ádepti yrym, tyıymmen tárbıelep kele jatqan dana halqymyzdyń ádemi úrdisin odan ári jańǵyrtý, jas urpaqtyń sanasyna halyq dástúrlerin sińirý.

Merekelik sharany Qazaqstan musylmandary dinı basqarmasynyń Nur-Sultan qalasy boıynsha ókili, respýblıkalyq «Áziret Sultan» meshitiniń Bas ımamy Erbolat Nuryldauly izgi tilegin arnap ashyp berdi. Qazaqtyń taǵy bir dástúrin jańǵyrtyp, merekeli kesh meshit qabyrǵasynda bilim alyp kele jatqan aq jaýlyqty analarǵa aq oramal jaýyp, qurmet kórsetýmen bastaý aldy.

Ásem ánmen árlenip, tátti kúımen kómkerilgen ádemi keshte quttyqtaý sóz alǵan qonaqtar legi kóbirek boldy. Qazaq Estradasynyń jaryq juldyzy, dástúrli ánshi Ardaq Balajanova arnaıy kelip, Naýryz merekesimen quttyqtap, ánnen shashý shashty.

QMDB-nyń Áıel-qyzdar sektorynyń meńgerýshisi, aıaýly ustaz Nurǵalıeva Dınara Qutqojaqyzy óziniń aq tilegin arnap, kelgen qonaqtardy Naýryz merekesimen quttyqtady. Elorda meshitteriniń áıel ustazdary keshke arnaıy shaqyrylyp, barlyǵyna uıymdastyrýshylar tarapynan shapan jabylyp, sııapat jasaldy. Merekelik keshte ardaqty Paıǵambarymyzdyń (s.ǵ.s) ósıetteri, din men dástúr sabaqtastyǵy týraly nasıhat aıtylyp, kelgen qonaqtar rýhanı sýsyndady.

Sondaı-aq, halqymyzdyń salt-dástúrleriniń úlken segiz topqa jiktelgen túrleri atalyp, qazaq halqynyń umytylyp bara jatqan dástúrleri týraly keń maǵlumat berildi. Kesh sońynda osyndaı úlgi alarlyq kórkem sharanyń ótýine uıytqy bolǵan «Ábý Nasyr ál-Farabı» meshitiniń ustazy, «Jibek» qyz-kelinshekter  klýbynyń jetekshisi Áıkerim Qazbekqyzy kelgen qonaqtarǵa alǵysyn bildirip, aldaǵy ýaqytta da din men dástúrimizdi nasıhattaıtyn sharalar uıymdastyrylyp turatynyn atap ótti.