DINI BASQARMA ASTANADA AÝYZAShAR BERDI (FOTO)
Elordada Qazaqstan musylmandary dinı basqarmasynyń uıymdastyrýymen zııaly qaýym ókilderine, túrli sala qyzmetkerlerine, sondaı-aq qarttar jáne balalar úıindegi jandarǵa arnaıy aýyzashar berildi.
«Ramazan – izgilik aıy» ataýymen ótken rýhanı keshte QMDB Tóraǵasy, Bas múftı Naýryzbaı qajy Taǵanuly aýyzashar dastarqanynyń qadirli qonaqtaryn qasıetti aımen quttyqtap, izgi tilegin arnady.
«San ǵasyrdan beri Islam dinin rýhanı tiregi etken halqymyz berekeli Ramazan aıyn erekshe daıyndyqpen kútken. Saýaptar eselenip jazylatyn aıda aýyzashar berip, kómekke muqtaj jandarǵa pitir sadaqasyn úlestirip, úlkenderdiń alǵysy men batasyn alýǵa tyrysqan.
Orazada ıgi nıetpen oryndalatyn izgi amaldar búginde salt-dástúrimizge aınalyp, urpaqtan-urpaqqa jalǵasyp keledi. Jarapazan aıtý, aýyzashar berý syndy ıgi amaldar din men dástúrimizdiń ortaq qundylyqtaryna aınaldy. Biz osy dástúrimizdi jańǵyrtý maqsatynda aýyzashardy saltymyzǵa saı ótkizýge mán berip kelemiz. Qazir jarapazan aıtý saltymyz qoǵamdyq deńgeıde nasıhattalýda.
Ózderińizge belgili, jýyrda elimizdiń Prezıdenti Joǵary Mártebeli Qasym-Jomart Kemeluly meni Aqordada arnaıy qabyldap, odan keıin ata-baba saltymen aýyzashar berip, halqymyzǵa ónege kórsetti. Aýyzashar dastarhanynda Memleket basshysy: «Múftııat qoǵamdaǵy turaqtylyq pen tatýlyqty nyǵaıtýǵa zor úles qosyp keledi. Bul rette halqymyzdyń dúnıetanymyna saı dástúrli ıslamdy dáripteý qajet. Qazaqtyń ádet-ǵurpy árdaıym izgilikke shaqyrady» dep atap ótken bolatyn. Múftııat árqashan din men dástúr sabaqtastyǵyn nasıhattap, halyqty izgilikke úndep keledi. Bul bizdiń qoǵam aldyndaǵy basty mindetimiz bolyp qala beredi» dedi QMDB Tóraǵasy.
Óz kezeginde quttyqtaý sóz kezegin alǵan aqsaqaldar men zııaly qaýym ókilderi, atap aıtqanda Memleket jáne qoǵam qaıratkeri Myrzataı Joldasbekov, Aqparat jáne qoǵamdyq damý mınıstri Darhan Qydyráli, QMDB janynan qurylǵan Aqsaqaldar keńesiniń múshesi Jabal Erǵalıev, musylman elderinen kelgen elshiler atynan Palestına elshisi doktor Montaser Abýzeıd myrza Bas múftıge alǵys bildirip, Dinı basqarmanyń ıgi bastamalaryna sáttilik tiledi.
Rýhanı keshte termeler oryndalyp, kúı tartyldy jáne jas talanttardan quralǵan ónerpazdar toby zamanaýı dástúr úrdisimen jarapazan jyryn aıtty.
Kesh sońynda qasıetti Quran aıattary oqylyp, Bas múftı Naýryzbaı qajy Taǵanuly arnaıy duǵa jasady. Sondaı-aq QMDB Tóraǵasy aqsaqaldar men aq jaýlyqty analarǵa jáne balalarǵa arnaıy ramazan syıyn tabystady.
