DINI BASQARMA ASTANADA AÝYZAShAR BERDI (FOTO)
Elordada Qazaqstan musylmandary dinı basqarmasynyń uıymdastyrýymen zııaly qaýym ókilderine, musylman memleketteriniń elshilerine, múftııat janyndaǵy Aqsaqaldar, Sarapshylar men Jastar keńesiniń múshelerine aýyzashar berildi.
«Ramazan – birlik pen bereke aıy» ataýymen ótken rýhanı keshte QMDB Tóraǵasy, Bas múftı Naýryzbaı qajy Taǵanuly aýyzashar dastarqanynyń qadirli qonaqtaryn qasıetti aımen quttyqtap, izgi tilegin arnady.
«Ramazan – on eki aıdyń sultany, berekeli de keshirimi mol aı. Kúndelikti tirshilik qamymen júretin pendeniń júregine bul aıda ıman nury quıylady. Óıtkeni oraza adamdy taqýalyqqa tárbıeleıdi. Sabyrlyq, qaıyrymdylyq, meıirimdilik, baýyrmaldyq sekildi adamdyq asyl qasıetter artyp, ıman kúsheıedi. Ramazan – Allanyń meıirimi tógilip, jumaqtyń esigi aıqara ashylatyn, ımandy kúsheıtýge múmkindik berilgen qasıetti aı.
Oraza – kúndiz tek iship-jeýden ózin shekteý degen sóz emes. Oraza – rýhtyń azyǵy, tánniń shıpasy. Ramazan jan men tándi rýhanı tazartatyn, musylman úshin úlken sabyr mektebi. Aýzy berik jandar ózine dórekilik kórsetken keıbir kisilerge: «Men orazamyn», – degen bir aýyz sózben kórkem minezdiń keremet úlgisin kórsetedi. Nápsisine toqtaý salyp, sabyr saqtaıdy. Al sabyr ıesine beriletin syı – jánnat.
Densaýlyǵyna baılanysty nemese kárilik jetip oraza ustaýǵa shamasy jetpegen adamdar aýyz bekitken kisilerge aýyzashar berse, ol da – úlken saýap. Paıǵambarymyz Muhammed (oǵan Allanyń salaýaty men sálemi bolsyn): «Alla Taǵala eń bolmasa bir túıir qurma, tipti bir urttam sýmen bolsa da qamqorlyq jasaǵanǵa saýap jazady…» – degen.
Rabbymyz Ramazanda bizdi aram nárseni bylaı qoıǵanda adal bolǵan amaldyń ózinen tyıyp otyr. Kúndiz adal bolǵan as-sýdy ishýden tyıylamyz. Munyń hıkmeti ne? Oraza qulshylyǵynyń túpki máni – Allany jaqsy kórýge, Onyń razylyǵyna jeteleıtin amaldardy jaqsy kórýge umtylý» dedi QMDB Tóraǵasy.
Óz kezeginde rýhanı keshtiń qurmetti qonaqtary Bas múftı Naýryzbaı qajy Taǵanulyna alǵys aıtyp, Dinı basqarmanyń rýhanııat salasyndaǵy aýqymdy isterine tilektestigin bildirdi. Kesh sońynda qasıetti Quran aıattary oqylyp, Bas múftı arnaıy duǵa jasady. Sondaı-aq aýyzashar qonaqtaryna Ramazan syılyǵy tabys etildi.
