DINI BASQARMA QYZYLJAR ÓŃIRINDE AÝYZAShAR BERDI (FOTO)

Qazaqstan musylmandary dinı basqarmasynyń uıymdastyrýymen Soltústik Qazaqstan oblysynyń ortalyǵy Petropavl qalasynda qasıetti Ramazan aıynda oraza ustaǵan jergilikti jamaǵatqa arnaıy aýyzashar dastarqany jaıyldy. Aıtýly is-sharaǵa QMDB Tóraǵasy Naýryzbaı qajy Taǵanuly qatysyp, batasyn jasady.

«Sizdermen bir dastarqan basynda, Qyzyljar óńirinde aýyz ashyp otyrǵanyma óte qýanyshtymyn. Biz buǵan deıin Astana, Almaty, Túrkistan qalalarynda ózderińizdeı el ıgiligi jolyndaǵy azamattarǵa aýyzashar berdik. Búgin mine ózderińizben dıdarlasý násip bolǵan eken. Allaǵa shúkir. Asyl dinimizde aýyzashar berýdiń saýaby óte mol.

Ardaqty Paıǵambarymyz (oǵan Allanyń salaýaty men sálemi bolsyn): «Aýzy berik jandy aýyzasharǵa shaqyryp tamaq bergen kisi – oraza ustaǵan adamnyń alatynyndaı saýap alady. Aýzy berik adamnyń saýabynan da eshnárse kemimeıdi», – degen. Minekı, búgin sizdermen Ramazan aıynyń eń qadirli dep sanalatyn sońǵy on kúninde bas qosyp otyrmyz. Bul kúnderi yqylasymyzdy arttyra túsýimiz kerek. Osy aýyzashar dastarqanynda otyrǵan barshańyzǵa Alla jar bolsyn, jaqsylyq tileımin» dedi Bas múftı.

Aýyzashar kezinde jamaǵatqa QMDB jumysyn baıandaıtyn beınerolık usynylyp, Ramazannyń qasıeti jaıynda arnaıy beınesıýjet kórsetildi. El aqsaqaldary men aq jaýlyqty analar sóz sóılep, yqylasyn jetkizse, ónerpaz jigitter jarapazan jyryn aıtty.

Buǵan deıin birneshe óńirde berilgen aýyzashar dastarqany osylaısha Petropavl qalasynda qorytyndylandy.