«El úlesi – páterge»: 5 otbasy baspanaly boldy (FOTO)
Qazaqstan musylmandary dinı basqarmasynyń «Zeket» qorynyń Mańǵystaý oblysyndaǵy fılıalynyń uıymdastyrýymen búgin «El úlesi – páterge» aktsııasynyń aıasynda 255, 256, 257, 258 jáne 259-shy úılerdiń kilti tabys etildi.
Buǵan deıin aıaýly ana Bıbi Jamal Ábdimálikqyzynyń dúnıeden ótkenine qyryq kún ótýine oraı elimiz boıynsha 6300 otbasyǵa qaıyrymdylyq kórsetilgenin habarlaǵan edik. Al QMDB tóraǵasy, Bas múftı Naýryzbaı qajy Taǵanulynyń usynysyn qabyl alyp, juqpaly indet qaýpi órship turǵan kezeńde eske alý rásimin osylaı ótkizýdi jón sanaǵan Bıbi Jamal Ábdimálikqyzynyń urpaqtary muqtaj otbasylarǵa azyq-túlik jetkizip qana qoımaı, Mańǵystaý óńirinde baspanaly bolsam dep júrgen 5 muqtaj otbasyǵa páter kiltin tabystady.
Atalmysh qaıyrymdylyq is-sharasy barysynda 2 páter Aqtaý qalasynan, 3 páter Munaıly aýdanynan berildi. Atap aıtqanda, 4 páter kóp jyldan beri baspana jaǵynan tarshylyq kórgen 4 otbasyǵa buıyrsa, Qazaqstan musylmandary dinı basqarmasyna 30 jyl tolýyna oraı shalǵaı aýyldardaǵy 30 din qyzmetkerin baspanamen qamtamasyz etý sharasy aıasynda úsh bólmeli páterdiń kilti Aqtaý qalalyq «Beket ata» meshitiniń ustazy Jeńis Seleýbaıǵa tabystaldy.
QMDB-nyń Mańǵystaý óńiri boıynsha bas ımamy Ánýar Izimbaıuly jáne óńirdegi aýzy dýaly batagóı qarııalardyń biri Lepes qajy Qosmaǵanbetuly atalmysh is-sharaǵa arnaıy qatysyp, baspanaly bolyp jatqan otbasylarǵa aq batasyn berip, baq-bereke tiledi.
