«EL ÚLESI – PÁTERGE»: 626-BASPANA TABYSTALDY (FOTO)
Aqmola oblysynda QMDB «Zeket jáne qaıyrymdylyq» qorynyń «El úlesi – páterge» jobasy aıasynda 626-úıdiń kilti baspanaǵa asa muqtaj otbasyǵa tabystaldy.
Igi is-sharaǵa Bas múftı keńesshisi Kenjetaı Baıkemeluly, «Zeket jáne qaıyrymdylyq» qorynyń dırektory Maqsatbek Qaıyrǵalıev, sondaı-aq Respýblıkalyq bas meshittiń ımamy Qanat Qydyrmın men Aqmola oblysynyń bas ımamy Qýanysh Jumabaıuly arnaıy qatysty.
Eske sala keteıik, 22 qańtarda Aqmola oblysy Tselınograd aýdanynyń Qabanbaı batyr aýyldyq-okrýgine qarasty Sarykól aýylynda turatyn Erjan Rymbekulynyń úıi órtenip, tolyq janyp ketken bolatyn. Qapııada baspanasyz qalǵan otbasyǵa «Zeket jáne qaıyrymdylyq» qory din qyzmetkerleriniń jáne jomart jandardyń uıytqy bolýymen páter syılap otyr. Qamyqqan otbasyny qýantqan ıgi sharada úlkender bata berip, shashý shashty. Din qyzmetkerleri Erjan Rymbekulynyń jańa baspanasyna bereke tilep, júrekjardy lebizin bildirdi.
Astanadaǵy Respýblıkalyq bas meshitte santehnık qyzmetin atqaryp júrgen Erjan Rymbekulynyń jubaıy ekinshi toptaǵy múgedek, al úlken qyzy balalardyń tserebraldy sal (DTsP) aýrýyna shaldyqqan.