Elorda ımamdary qolǵa sý quıý dástúrin tanystyrdy

Astana qalasyndaǵy «Ál-Ǵanı» meshitinde qazaq halqynyń salt-dástúrin nasıhattaýǵa arnalǵan taǵylymdy is-shara ótti. Jıyn barysynda dastarqan ádebindegi qolǵa sý quıý dástúriniń máni túsindirildi.

Is-sharaǵa QMDB Din men dástúr bóliminiń meńgerýshisi Nurbek Áýeshanuly, Astana qalasynyń bas ımamy Erbolat Júsipov jáne elorda ımamdary qatysty.

Kezdesý barysynda qazaq halqynyń qonaq kútý ádebi, dastarqan mádenıeti jáne as aldynda, as sońynda qolǵa sý quıý dástúriniń tárbıelik mańyzy aıtyldy. Sonymen qatar bul dástúrdiń tazalyqqa, úlkenge qurmet pen qyzmet kórsetý ádebine negizdelgeni túsindirildi.

Qolǵa sý quıý dástúriniń mán-maǵynasyna «Sádýaqas qajy Ǵylmanı» meshitiniń naıb ımamy Qondybaı Ákbarov toqtalyp, onyń qazaqy tárbıe men izettiliktiń kórinisi ekenin atap ótti.

Is-shara barysynda ulttyq dástúrdi dáripteý, jastarǵa ata saltyn tanytý jáne din men dástúr sabaqtastyǵyn saqtaý jaıy sóz boldy.

Jıyn sońynda qatysýshylar ulttyq qundylyqtarǵa arnalǵan mazmundy kezdesýden áser aldy.