ELORDA TÓRINDE RÝHANI MÁÝLIT KEShI ÓTTI
Elordada Qazaqstan musylmandary dinı basqarmasy Astana qalasy ókildiginiń uıymdastyrýymen «Adaldyq – Paıǵambar (ﷺ) ósıeti» atty rýhanı Máýlit keshi ótti.
Ardaqty Paıǵambarymyz Muhammedtiń (oǵan Allanyń salaýaty men sálemi bolsyn) týǵan aıyna oraı ótken taǵylymdy jıynǵa QMDB Tóraǵasy, Bas múftı Naýryzbaı qajy Taǵanuly, Halyq qaharmany, general Baqytjan Ertaev, memleket jáne qoǵam qaıratkerleri Jabal Erǵalıev pen Álıhan Baımenov, QR Din isteri komıteti tóraǵasynyń orynbasary Maqsat Ramanqulov, sondaı-aq birqatar musylman memleketteriniń elshileri qatysty.
Rýhanı kesh barysynda Bas múftı jamaǵatqa Máýlit aıynyń mańyzyn atap ótip, barsha musylman qaýymdy aıtýly aımen quttyqtady. Sonymen birge Alla Elshisiniń (ﷺ) ǵıbratqa toly ómir jolyn úlgi etip, qoǵamda adaldyqty tý etýge, jaqsylyq jasaýǵa jáne eńbekti qadirleýge úndedi.
«Adamzattyń asyly, ardaqty Paıǵambarymyz Muhammedtiń (oǵan Allanyń salaýaty men sálemi bolsyn) bizderge paıǵambar retinde jiberilýi –Alla Taǵalanyń adamzat balasyna degen úlken nyǵmeti men meıirimi. Alla Taǵala Qasıetti Qurannyń «Ánbııa» súresiniń 107 aıatynda: «Ýa, Muhammed! Biz seni kúlli álemge teńdesi joq raqym retinde ǵana jiberdik», – dep aıtqan.
Ardaqty Paıǵambarymyzdyń bolmysy, jeke tulǵasy – bizder úshin meıirim. Sózimen, isimen bolǵan súnnetteriniń barlyǵy sol meıiriminińtápsiri ispettes. Osy rette erekshe aıta keter jaıt: kez kelgen musylmannyń Alla elshisin shynaıy jaqsy kórýi úsh jaǵdaıda kórinis tabady. Birinshisi bilim men tanym arqyly kórinis tabady. Biz onyń ómirbaıanyn, hadısterin, ustanǵan jolyn jáne súnnetin oqyp-úırenemiz ári jattaımyz.
Onyń oryndaýǵa mindetti bolǵan súnnetterin, mustahab, ıaǵnı unamdy isterin jáne basqa da ilimderin meńgerýge umtylamyz. Óıtkeni adam ózi jaqsy kórgen tulǵany tanýǵa, onyń ómiri men ónegesin bilýge talpynady. Sol úshin Qazaqstan musylmandary dinı basqarmasy jyl saıyn Máýlit keshin respýblıka deńgeıinde ótkizip keledi. Mundaǵy maqsat – Paıǵambarymyzdy, onyń ómiri men ónegeli isin jamaǵatqa kóbirek dáripteý»,- dedi Bas múftı.
