Elordada tuńǵysh ret qaıyrymdylyq mekemesi ashyldy (FOTO)

Qýanyshty oqıǵalar qatarynan oryn alǵan keshegi kún Elorda tarıhynda erekshe saqtalyp qalmaq. Óıtkeni, dál osy kúni Nur-Sultan qalasynda úsh birdeı rýhanı nysan paıdalanýǵa berilip, Bas shahardyń rýhanı damýyna ólsheýsiz úles qosyldy. Esterińizge sala keteıik, ashylǵanyna 13 jyldyń júzi bolǵan «Astana» medrese-kolledji keshe jańa ǵımaratqa kóship, qýanyshty qonys toıyn jamaǵatpen birge atap ótken bolatyn. Sondaı-aq, Nur-Sultan ókildiginiń bastamasymen bıylǵy jyly medreseniń Qyzdar bólimi ashylyp, «Áljan ana» meshiti janyndaǵy jeke ǵımaratta jańa oqý jylyn bastap ketti.

Igi oqıǵalar legin qalamyzdyń Ońtústik-shyǵys aýdanynda ornalasqan «Súleımen» qaıyrymdylyq mekemesiniń ashylý saltanaty jalǵastyryp, qýanysh ústine qýanysh qosa tústi. Demeýshi azamattardyń qoldaýy arqasynda iske qosylǵan qaıyrymdylyq mekemesi Elorda qalasyndaǵy stýdentterdi jatyn orynmen qamtamasyz etip, ımandylyqqa uıytqan rýhanı ordaǵa aınalatyn bolmaq. Qazirgi ýaqytta qaıyrymdylyq mekemesinde arnaıy tizim boıynsha iriktelgen 20 stýdent jaıǵastyrylǵan. Stýdentterdiń barlyǵy derlik JOO-nyń jataqhanasynan oryn tımegen kóp balaly, áleýmettik az qamtylǵan otbasydan shyqqan.

Qaıyrymdylyq mekemesiniń ashylý saltanatyna QMDB tóraǵasy, Bas múftı Serikbaı qajy Oraz bastaǵan din qyzmetkerleri men Elorda qalasynyń jamaǵaty qatysyp, ıgi sharanyń kýási boldy. Jataqhana bólmelerin aralap, shákirttermen júzdesken Bas múftı aq batasyn arnap, stýdent jastarǵa bilim jolyndaǵy izdenisteri jemisti bolýyn tiledi.

Shara sońynda qýanyshty oqıǵaǵa oraı merekelik dastarhan jaıyldy. Aq tilekter aǵytylyp, bata-duǵamen áserlene túsken otyrys barysynda Bas múftı Serikbaı qajy Oraz osy sharaǵa atsalysqan barsha demeýshi jandarǵa, qaıyrymdylyq mekemesiniń ashylýyna uıytqy bolǵan Nur-Sultan ókildigi qyzmetkerlerine óz alǵysyn bildirdi.

Sýretterdi «FOTOGALEREIa» aıdarynan kóre alasyzdar!