ELORDADA JAS OTBASYLARMEN TAǴYLYMDY IS-ShARA ÓTTI

Búgin elordadaǵy «Nursultan» meshitinde QMDB Astana qalasy ókildiginiń uıymdastyrýymen «Berekeli shańyraq – adal qoǵam negizi» taqyrybynda taǵylymdy is-shara ótti.

Rýhanı jıynǵa Astana qalasynyń Bas ımamy Nurbek qajy Áýeshanuly, QMDB «Din men dástúr» bóliminiń meńgerýshisi Marat Dálelhanuly, «Nur-Sultan» meshitiniń ımamy Qanat Qydyrmın jáne basqa da din qyzmetkerleri men jas otbasylar qatysty.

Otbasy qundylyqtaryn dáripteýge baǵyttalǵan is-sharada neke men otbasy ınstıtýtynyń mańyzy, erli-zaıyptylar arasyndaǵy syılastyq, bala tárbıesi, sondaı-aq din men dástúr sabaqtastyǵy sóz boldy. Berekeli jıyn aıasynda neke qııý, sábıge azan shaqyryp at qoıý jáne tusaý kesý sekildi halqymyzdyń ómir saltynda qalyptasqan taǵylymdy rásimder de oryndaldy.

Is-sharanyń ashylýynda Astana qalasynyń bas ımamy Nurbek qajy Áýeshanuly otbasynyń qoǵamdaǵy ornyna toqtalyp, berekeli shańyraq qurýdyń mańyzyn atap ótti. Jas otbasynyń bolashaq urpaq tárbıesi qalyptasatyn qasıetti orta ekenin aıtyp, erli-zaıyptylardyń ózara qurmeti men jaýapkershiligi, ata-anany syılaý, balaǵa durys tárbıe berý, adal eńbek etý men keshirimdilik otbasy berekesiniń negizgi qundylyqtary ekenin jetkizdi.

«Jas otbasy – eki adamnyń ǵana odaǵy emes. Bul – bolashaq urpaqtyń tárbıesi qalyptasatyn, meıirim men jaýapkershilik, sabyr men syılastyq ornyǵatyn qasıetti shańyraq. Bizdiń dinimizde de otbasynyń orny erekshe. Erli-zaıyptylardyń bir-birine degen qurmeti, ata-anany syılaý, balaǵa durys tárbıe berý, adal eńbek etý, bir-birine keshirimmen qaraý – berekeli otbasynyń negizi. Al berekeli otbasylar kóbeıgen saıyn, qoǵam da ózgeredi. Shańyraqta adaldyq bolsa – qoǵamda ádildik bolady. Otbasynda meıirim bolsa – qoǵamda izgilik kóbeıedi. Úıde tárbıe bolsa – eldiń erteńi de jarqyn bolady», – dedi Nurbek qajy Áýeshanuly.

Budan keıin QMDB «Din men dástúr» bóliminiń meńgerýshisi Marat Dálelhanuly «Berekeli shańyraq – adal qoǵam negizi» taqyrybynda ýaǵyz-nasıhat aıtyp, otbasynyń ıslamdaǵy ornyna toqtaldy. Quran men hadıs negizinde otbasy qundylyqtaryn saqtaý, erli-zaıyptylardyń bir-birine degen syılastyǵy men jaýapkershiligi, ata-anaǵa qurmet kórsetý jáne urpaq tárbıesine mán berýdiń mańyzyn atap ótti. Sondaı-aq shańyraqtaǵy ımandylyq, ózara túsinistik pen meıirimniń otbasy berekesin arttyryp qana qoımaı, izgi urpaq tárbıeleýge jáne qoǵamnyń rýhanı ahýalyn nyǵaıtýǵa yqpal etetinin jetkizdi.

Is-shara barysynda jas jubaılardyń neke qııý rásimi ótkizilip, olarǵa shańyraqtarynyń berik, otbasylarynyń berekeli bolýyna qatysty aq tilekter aıtyldy.

Sondaı-aq sábıge azan shaqyrylyp, at qoıyldy. Budan bólek, búldirshinniń tusaýy kesilip, qadamyna aq jol tilep, qazaq halqynyń ejelden kele jatqan dástúri dáripteldi.

Rýhanı basqosý sońynda otbasylar arasynda suraq-jaýap oıyny uıymdastyrylyp, qatysýshylar belsendilik tanytty. Oıyn barysynda otbasy qundylyqtary men dinge qatysty túrli saýaldar qoıylyp, januıalarǵa arnaıy syılyqtar tabystaldy.

Kezdesý sońynda aqjoltaı tilekter aıtylyp, elimizdegi árbir shańyraqqa tatýlyq pen bereke, ár otbasyna amandyq pen baıandy baqyt tilep bata jasaldy.