Elordadaǵy «Áljan ana» meshitine bas ımam taǵaıyndaldy (FOTO)
Búgin Qazaqstan musylmandary dinı basqarmasynyń tóraǵasy, Bas múftı Serikbaı qajy Orazdyń buıryǵymen Serikbaı Ádilhan Imanáliuly Nur-Sultan qalasyndaǵy «Áljan ana» meshitiniń Bas ımamy qyzmetine taǵaıyndaldy. Qasıetti juma namazyna jıylǵan meshit ujymy men jamaǵatyna respýblıkalyq «Áziret Sultan» meshitiniń naıb ımamy Qanat Qydyrmın jańa bas ımamdy tanystyryp, Bas múftıdiń buıryǵyn oqyp berdi.
Elorda jamaǵatyna jaqsy tanys Ádilhan Imanáliuly buǵan deıin «Nur Astana» meshitinde uzaq jyldar boıy ımamdyq qyzmet atqaryp kelgen bolatyn. Jańa basshynyń osy jyldar ishinde jemisti eńbek atqaryp, din salasyna qosqan orasan úlesi jaıly aıtyp ótken Qanat Qydyrmın Serikbaı qarıǵa sáttilik tilep, izgi lebizin bildirdi.
Serikbaı Ádilhan Imanáliuly Qazirgi Túrkistan oblysy, Maqtaral aýdanynda 1980 jyly 21-mamyrda dúnıege kelgen.
1995-1997 jyldary Shymkent qalasyndaǵy «Arystanbab» medresinde bilim alǵan. 2000-2004 jyldary Halyqaralyq qazaq-arab ýnıversıtetin Dintaný mamandyǵy boıynsha támamdaǵan.
Qyzmet jolyn 2006-2007 jyldary QMDB Qaraǵandy oblysy ókil ımamynyń kómekshiliginen bastaǵan Serikbaı Ádilhan 2007-2011 jyldary «Nur Astana» ortalyq meshiti bas ımamynyń kómekshisi, 2011-2015 jyldary Qyzylorda oblystyq «Aqmeshit-Syrdarııa» ortalyq meshitiniń naıb ımamy, 2015-2019 jyldary Nur-Sultan qalasy «Nur Astana» ortalyq meshitiniń naıb ımamy qyzmetterin jemisti atqaryp keldi.
Qazaq, arab, parsy, túrik, ózbek tilderin erkin bilikti ustaz 2017-2019 jyldary L.N. Gýmılev atyndaǵy Eýrazııa Ulttyq ýnıversıtetiniń «Dintaný» kafedrasynyń bilim jetildirip, «Dintaný magıstri» dárejesine ıe bolǵan.
Búginde tórt balanyń ákesi bolǵan Ádilhan ımamnyń osy jyldar ishinde Astana qalasy ákimdiginiń Din problemalaryn zertteý ortalyǵynyń (2015), QMDB tóraǵasy, Bas múftıdiń (2017), Astana qalasynyń ákiminiń (2017), Astana qalasynyń Din isteri jónindegi basqarma basshysynyń (2017), Astana qalasynyń Qoǵamdyq damý isteri basqarma basshysynyń (2018) alǵys hattarymen marapattalǵany – qaltqysyz qyzmetiniń belgisindeı.
