«Ǵylmanı» meshitine Ramazan qarsańynda kúrdeli jóndeý júrgizildi (FOTO)
Elordamyzdyń oń jaǵalaýynan oryn tepken «Ǵylmanı» meshiti shahar musylmandaryna erteden tanys. Irgetasy sonaý 1996 jyly kóterilgen bul qulshylyq ordasy uzaq jyldar boıy qala halqyn rýhanııatqa uıytyp, ımandylyqqa shaqyrǵan qutty oryn bolyp keledi. Ashylǵaly beri san myń jamaǵattyń sájdesine kýá bolyp kele jatqan ǵımarattyń ýaqyt tezine tótep berip qana qoımaı, jyl sanap kórkeıip kele jatqan da jaıy bar. Árıne, bul ıgiliktiń bir ushy qulshylyq ordasyn kóziniń qarashyǵyndaı aıalaǵan meshit qyzmetkerleriniń qamqorlyǵy men Alla úıine degen yqylasy aıryqsha demeýshi azamattardyń janashyrlyqtarynda jatqany sózsiz.
Isi musylman qaýymy saǵyna kútken qasıetti Ramazan qarsańynda bul qulshylyq ordasy túgeldeı kúrdeli jóndeýden ótkizilip, ulyq aıdy jarqyraǵan saltanatpen qarsy alýǵa ázir. Jaqynda ǵana Bas múftı buıryǵymen «Ǵylmanı» meshitiniń bas ımamy qyzmetine taǵaıyndalǵan Nurlan Ramazanovtyń uıytqy bolýymen qulshylyq ordasynda birqatar aýqymdy jumystar júrgizilip, jamaǵatqa jaıly jaǵdaı jasaldy.
Atap aıtqanda, meshit ishindegi aýa tazartqysh-jeldetkish júıeleri tolyǵymen jańartylǵan. Taraýıh namazdary kezinde aýa tarylyp, jaısyzdyq sezinetin meshit jamaǵaty úshin jaǵymdy jańalyq osy boldy. Sondaı-aq, kilemderi túgeldeı aýystyrylyp, ishki jáne syrtqy qabyrǵalaryna júrgizilgen arnaıy hımııalyq tazartý jumystarynan soń qulshylyq ordasy qulpyryp sala bergendeı. Kúmbezi kúnge shaǵylyp, tazartý jumystarynan soń anadaıdan aǵarańdap kóz arbaǵan meshit munaralary, aýla ishinde tigilgen appaq qıiz úı men «Ramazan shatyry» da qulshylyq ordasyn erekshe kúıge bólep, qasıetti Ramazanǵa asyqtyra túskendeı.
Meshit bas ımamy Nurlan Ramazanovtyń aıtýynsha, kúrdeli jóndeý jumystary áli de jalǵasa túsetin kórinedi. Súıegi myqty salynǵan ǵımarattyń astyńǵy qabaty áýel basta dáris bólmelerine laıyqtalyp josparlanǵan kórinedi. Degenmen, jyldar óte kele sý ótip, syz tıgen bólmeler paıdalanýǵa jaramsyz bolyp, jertólege aınalyp ketken eken. «Osy oraıda meshittiń astyńǵy qabatynda qulshylyq ornyna aınaldyryp, meshittegi oryn tapshylyǵyn azaıtý josparlanyp otyr», - deıdi meshittiń bas ımamy.
Jyldaǵy úrdis boıynsha endi eki kúnnen keıin bul jerde kún saıyn 400 janǵa aýyzashar berilip, Ramazan keshteri taraýıh namazdarymen ásemdene túspek. Sáýleti artyp, jarqyraı túsken meshittegi jaılylyq jamaǵatqa jyly áserin tıgizeri sózsiz. Olaı bolsa, qurmetti oqyrman! Nur-Sultan qalasynyń qulshylyq ordalary qasıetti Ramazanǵa osyndaı ázirlikpen daıyndalý ústinde. Al, siz daıynsyz ba?!
Sýretter myna siltemede
