«Ǵylmanı» meshitine jańa bas ımam taǵaıyndaldy (FOTO)

Búgin Astana qalasyndaǵy «Sádýaqas Ǵylmanı» meshitine jańa bas ımam taǵaıyndaldy. QMDB tóraǵasynyń birinshi orynbasary, naıb múftı Naýryzbaı qajy Taǵanuly qasıetti juma namazyna jıylǵan jamaǵatpen júzdesip, Bas múftı Serikbaı qajy Orazdyń buıryǵymen tanystyryp ótti.

Elorda tórindegi eńseli meshittiń basshylyq qyzmetine respýblıkalyq «Áziret Sultan» meshitiniń naıb ımamy Nurlan Ramazanov taǵaıyndaldy. Al, bes jyldan astam ýaqyt boıy «Ǵylmanı» meshitiniń bas ımamy qyzmetin jemisti atqarǵan Jumanazar Sadyrhanov respýblıkalyq Bas meshittiń naıb ımamy qyzmetine aýystyryldy.

Qos qyzmetkerdiń de qarym-qabileti men bilim-biliktiligi jaıly naıb múftı Naýryzbaı qajy Taǵanuly jamaǵatqa qysqasha jetkize kele, jańa jumystaryna sáttilik tiledi. Jamaǵat atynan Jumanazar qarıǵa alǵys bildirip, iltıpat tanytty. Meshit kórki bolǵan aqsaqaldar qaýymy da Jumanazar Óserhanulyna aq batalaryn berip, jańa bas ımamǵa quttyqtaýlaryn jetkizdi.

Ramazanov Nurlan Bekbolatuly

1985 jyly  14-qazanda Aqmola oblysy, Kókshetaý qalasynda dúnıege kelgen.

2000-2003 jyldary Ońtústik Qazaqstan oblysy, Shymkent qalasyndaǵy «Darýl-arqam» Quran jattaý qarılyq medresesinde oqyǵan.

2003-2005 jyldary Almaty qalasyndaǵy «Taıba» qazaq-arab kolledjinde bilim alǵan.

2005-2009 jyldary «Nur Múbarak» Egıpet Islam mádenıeti ýnıversıtetiniń «Islamtaný» fakýltetin támamdaǵan.

Sırııa Damask qalasyndaǵy «Fathýl ıslam» ınstıtýtynyń kýrsynda; Egıpet astanasy Kaır qalasyndaǵy «Ál-Ázhar» ýnıversıtetine qarasty ımamdardyń bilim jetildirý kýrsynda; «Nıl» arab tili ortalyǵynda; Egıpet Aleksandrııa qalasynda Ýaqyf jáne Islam isteri mınıstirligine qarasty «Ábý Bákir Syddyq» ortalyqtarynda dinı bilimin jetildirgen.

EŃBEK JOLY:

2009-2011 jyldary Atyraý oblystyq «Imanǵalı» ortalyq meshitiniń naıb ımamy;

2011-2013 jyldary Atyraý oblysy, Qurmanǵazy aýdandyq «Temiráli» meshitiniń bas ımamy;

2013-2014 jyldary Atyraý oblystyq «Imanǵalı» ortalyq meshitiniń naıb ımamy;

2014-2017 jyldary «Nur Astana» Ortalyq meshitiniń naıb ımamy qyzmetterin atqarǵan.

2017 jyldyń jeltoqsan aıynan bastap respýblıkalyq «Áziret Sultan» meshitiniń naıb ımamy qyzmetin abyroımen atqaryp kelgen.