«HALAL EXPO-2022» KÓRMESI AIaSYNDA SEMINAR ÓTTI (FOTO)

QMDB Tóraǵasy, Bas múftı Naýryzbaı qajy Taǵanulynyń bastamasy, «Halal Damý» mekemesiniń uıymdastyrýymen Astana qalasynda ótip jatqan halyqaralyq «Halal EXPO-2022» kórmesi aıasynda kásipkerlerge arnalǵan semınar uıymdastyryldy.

Halal ındýstrııasyna yqpal etýshi negizgi alańnyń biri sanalatyn sharaǵa «Halal Damý» dırektory Aıbek Asqarbekuly, «Zeket» qorynyń dırektory Maqsatbek Qaıyrǵalıev jáne tehnolog mamandar qatysyp, halal kásipkerlik pen adal saýda, halal standarttaý jáne sertıfıkattaý máselelerin talqylady.

«Halal  – el Ekonomıkasy men Islam álemi úshin mańyzdy baǵyttardyń biri desek, qatelespeımiz. Qulshylyqtyń ózegin halal quraıdy.  Álemde halal ónimge degen suranys kún sanap artyp keledi. Halyqaralyq Ekonomıkalyq qatynastardy nyǵaıtý, halal ındýstrııasyn qoldaý maqsatynda «HALAL EXPO 2022» kórmesi uıymdastyryldy. Bul shara saýda naryǵyndaǵy jańa baǵyttarǵa jol ashady dep senemiz», – degen Aıbek Asqarbekuly halal sertıfıkattaý jáne standarttaýǵa qatysty ózekti máselerdi qozǵap, qatysýshylar nazaryna usyndy.

Sonymen qatar ózge de mamandar halal jóninde keńinen aqparat berip, kásipkerler suraqtaryna jaýap berdi. Aıta keteıik, sheteldik jáne otandyq halal kásiporyndardyń qatysýymen uıymdastyrylyp jatqan halyqaralyq kórme búgin keshke deıin jalǵasady.

​