«HALAL EXPO-2023» HALYQARALYQ KÓRMESINIŃ QORYTYNDYSY
Bıyl Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanulynyń bastamasymen III ret uıymdastyrylǵan halyqaralyq «HALAL EXPO-2023» halyqaralyq kórmesi qorytyndylandy.
Almaty qalasynda ótkizilgen kórmege Indonezııa men Malaızııa, Qyrǵyzstan men Ózbekstan, Reseı men Tatarstan, Belarýs pen Mońǵolııa sııaqty álemniń 9 eliniń ókilderi men otandyq eń úzdik 100 kásiporyn qatysty. Eki kún aıasynda 20 myńǵa jýyq adam kórmege kelip, otandyq jáne shet eldik halal ónimdermen tanysty.
Ult pen ulystardyń basyn qosyp, óndirýshiler men tutynýshylardyń arasyn jalǵaǵan halyqaralyq kórmede 7 tonnaǵa jýyq shujyq ónimderi, 11,5 tonnaǵa jýyq qus ónimderi, 6 tonnadaı kondıterlik ónimder, 3 tonnadan astam jartylaı fabrıkattar, 4 tonnaǵa jýyq sýsyndar (kofe, sháı, sıroptar), 9 tonna sút ónimderi, 5 tonnaǵa jýyq et ónimderi satyldy. Sonymen qatar, kórmeniń nátıjesinde kásiporyndar arasyndaǵy áriptestik baılanys nyǵaıyp, ózara memorandýmǵa qol qoıyldy. Ásirese, qus fabrıkalary men shujyq tsehtary arasyndaǵy kelisim nátıjesinde shet eldik qus ónimderine degen táýeldilik máselesi oń sheshimin tapty. Jáne de osy kórme aıasynda «Halal Eýrazııalyq Odaq» uıymynyń forýmy ótkizildi. Forýmda ortaq halal standartyn bekitip, sol boıynsha birigip jumys jasaý usynyldy.
Kórme tutynýshylarǵa otandyq jáne shet eldik kásiporyndardyń qyzmetimen tanysýǵa, qoljetimdi baǵada halal ónimderimen saýda jasaýǵa múmkindik berdi. Halal ındýstrııasyn damytý, halyqaralyq baılanysty nyǵaıtý, túrli ónimderdi tanytýda kópshiliktiń kóńilinen shyǵyp, halyqtyń oń baǵasyn alǵan halyqarylyq kórme keler jyly da jalǵasyn tabady.
