«ISLAM ENTsIKLOPEDIIaSY» KITABY JARYQ KÓRDI (FOTO)

Búgin Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanulynyń jetekshiligimen jaryq kórgen «Islam Entsıklopedııasy» kitaby oqyrmanǵa jol tartty.

«MUFTIYAT» baspasynan jaryq kórgen kitaptyń tusaýkeser rásimine QMDB Tóraǵasy Naýryzbaı qajy Taǵanuly, tarıhshy, fılolog ǵalymdar men zııaly qaýym ókilderi, Dinı basqarma janyndaǵy Aqsaqaldar jáne Sarapshylar keńesiniń músheleri, sondaı-aq BAQ ókilderi qatysty.

«Ózderińizge málim, Memleket basshysy qadirli Qasym-Jomart Kemeluly bir sózinde: «Halqymyzdyń dúnıetanymyna saı dástúrli ıslamdy dáripteý asa mańyzdy. Onyń ǵylymı-teorııalyq negizin damytý qajet», – degen bolatyn. Oqyrmanǵa jol tartqan «Islam Entsıklopedııasy» kitaby – dástúrli dinimizdiń ǵylymı-teorııalyq negizin damytýǵa baǵyttalǵan Qazaqstan musylmandary dinı basqarmasynyń aýqymdy jobasynyń biri bolmaq. Árıne buǵan deıin elimizde Islam dini jaıly túrli Entsıklopedııalar jaryq kórdi. Aldyńǵy aǵa býyn bastaǵan izgi isti ary qaraı jalǵap, jetildirýdi qolǵa aldyq. Dinı basqarma daıyndaǵan «Islam Entsıklopedııasynyń» ereksheligi – Islam dinine arnalǵan elimizdegi alǵashqy kóptomdyq Entsıklopedııa bolǵaly tur. Buıyrsa bul eńbektiń 5 tomyn oqyrmanǵa usynbaqpyz. Alla násip etse, barlyq tomdary retimen jaryqqa shyǵyp, oqyrmandar qolyna tıedi degen senimdemiz» dedi Bas múftı.

Sondaı-aq saltanatty rásimde QR Prezıdentiniń keńesshisi Baýyrjan Omarov, belgili ǵalymdar Ǵarıfolla Esim, Dıhan Qamzabekuly, Aıgúl Ismaqova izgi tilegin bildirip, jańa eńbek qazaq qoǵamyna paıdaly bolady degen nıetin jetkizdi.

Aıta keteıik, «Islam Entsıklopedııasy» dinı sala qyzmetkerleri men izdenýshi shákirtter, ǵalymdar jáne jalpy oqyrman qaýymǵa arnalǵan.

​