KENTAÝDA QARILAR ORTALYǴY JANYNAN QYZDAR BÓLIMI AShYLDY (FOTO)
QMDB Tóraǵasy, Bas múftı Naýryzbaı qajy Taǵanuly Túrkistan oblysynyń Kentaý qalasyndaǵy «Balabı qarılar daıyndaý ortalyǵy» qyzdar bóliminiń ashylý saltanatyna qatysty.
Eń aldymen Qasıetti Quran aıattary oqylyp, Bas múftı qarılarǵa batasyn berdi. Naýryzbaı qajy Taǵanuly quttyqtaý sózinde Kentaýdaǵy medreseniń mańyzyna toqtalyp, shákirtterdiń Quranǵa degen qurmeti jóninde sóz aıtty.
«Aısha anamyz: (Alla oǵan razy bolsyn) Paıǵambarymyzdan (oǵan Allanyń salaýaty men sálemi bolsyn) myna hadısti jetkizedi: «Qurandy jatqa bilip oqýshy perishtelermen birge bolady. Al, qınalsa da jattap alý úshin oqyǵan adamnyń dárejesi eki esege ulǵaıady» delingen. (Buharı, Múslım). Dana qazaq «Jasynda baıqary joqtyń qartaıǵanda aıtary joq» degen. Bul degenimiz qarttyq kelgende ımannan alǵan áseri joq, Qurannan alǵan qýaty joq degen sóz. Jas kezinde Quran jattaǵan adamdy Alla qarttyqtyń azabynan saqtaıdy deıdi. Al sahabalardyń biri Ibn Abbas (r.a): «Kim Qurandy tolyq jattasa, ol qarttyqtyń qaljyraýyna ushyramaıdy», - degen.
Bıyl biz dinı qyzmet aıasynda 2024 jyldy «Islam jáne dástúr qundylyǵy» jyly dep atadyq. Osy jyly dástúrli ıslamdy dáripteý, salt-dástúrimizdi barynsha nasıhattaý jumystary júrgizilmek. Osy oraıda medresede tálim alyp jatqan shákirtterimizge de qulaqqaǵys bolsyn. Din men dástúrimizdi qatar úıretý kerek. Qazaqy dúnıetanymymyzǵa saı tárbıe bersek olar úshin esh alańdamamaımyz. Bizdiń yrymdarymyzdyń tárbıelik máni, qazaq dástúrindegi otbasylyq tárbıe osynyń bári medresede de úıretilýi tıis. Barshańyzǵa Alla jar bolsyn! Qyzdar bóliminiń jańa ǵımaraty qutty bolsyn» dep izgi nıetin jetkizdi.
Eńseli ǵımarattyń ashylý rásiminen soń qonaqtar qyzdar bólimin aralap tolyq tanysty. Medrese dırektory Arman Qýanyshbaevtyń sózinshe, ǵımarattyń syıymdylyǵy 70 shákirtke arnalǵan. Ortalyq sport zalymen, ashana, oqý zaly jáne jataqhanamen qamtylǵan. Ortalyqtyń sport zaly kópfýnktsııanaldy. Munda erler jáne qyz balalar óz kezegimen sportpen shuǵyldanady. Ortalyqta qyzdar 16 jastan 22 jasqa deıin qasıetti Quran Kárimdi tolyq jattaýǵa múmkindigi bar.
Sonymen qatar bólimde qyzdar óz sheberlikterin shyńdap, óz qoldarymen túrli dúnıe daıyndaıdy. Qazirgi tańda bólimde 40 qyz tálim alýda. Aıta keteıik, oqý bazasynyń alǵashqy kirpishin de Bas múftı Naýryzbaı qajy Taǵanuly arnaıy kelip qalaǵan bolatyn.
Derekkóz: QMDB Baspasóz qyzmeti
