KFS-ge berilgen «QMDB halal sertıfıkaty» óz kúshin joıdy

Qurmetti, halal ónimdi tutynýshylar!

«The Caspian International Restaurants Company» JShS-na qarasty «KFS» restorandar jelisine berilgen «QMDB halal» sertıfıkaty óz kúshin joıǵandyǵyn habarlaımyz.

Esterińizge sala ketsek, buǵan deıin «KFS» restorandar jelisi Reseı Federatsııasyna qarasty halal standart talaptaryna saı óndiriletin, QMDB «Halal Damý» JShS-niń arnaıy oqytylǵan qasapshylary tek qana qolmen baýyzdap, birneshe aýysymmen jumys istegen, «ólekse jemmen (mıasokostnaıa mýka) qorektendirilmegen» «Belaıa ptıtsa» qus ónimderin paıdalanyp keldi. Alaıda, RF tarapynan týyndaǵan zańdyq shekteýlerge baılanysty «KFS» restorandar jelisine tasymaldanatyn «Belaıa ptıtsa» taýyq ónimderiniń kólemi azaıǵandyqtan, «KFS» mekemesi basshylyǵy «Belaıa ptıtsa» qus ónimderimen qatar, QMDB halal standarty talaptaryna sáıkes kelmeıtin basqa da birneshe «Qus fabrıkalarynyń» taýyq ónimderin qoldanyp otyr.

Qazirgi tańda «KFS» mekemesi qoldanyp jatqan «Belaıa ptıtsadan» basqa  taýyq ónimderi QMDB “Halal Damý» JShS-ń  «Mal baýyzdaý jáne et óńdeý halal standarty» 1:2016 jáne «Halal ónimderin tasymaldaý men satýǵa, saqtaýǵa, óńdeýge, daıyndaýǵa, óndirýge jalpy talaptar» 3: 2016 standarttary talaptaryna sáıkes kelmeıdi.

Sol sebepti, QMDB «Halal Damý» JShS men «The Caspian International Restaurants Company» JShS arasyndaǵy kelisimsharttyń ýaqytsha toqtaǵandyǵyn, «KFS» restorandar jelisiniń taýyq ónimderi tolyǵymen «QMDB halal standart» talaptaryna sáıkes kelmeıinshe, mekemege berilgen «QMDB Halal» sertıfıkaty men «KFS» ónimderiniń syrtqy qaptamalaryndaǵy «QMDB halal» tańbasynyń óz kúshin joıǵandyǵyn habarlaımyz.