«KÓKTAL» MEShITINDE RAMAZAN AIYNA DAIYNDYQ SEMINARY ÓTTI (FOTO)
«Kóktal» meshitinde qasıetti Ramazan aıyna oraı jamaǵat arasynda arnaıy semınar uıymdastyryldy.
Taǵylymdy kezdesýdi meshittiń jastar isine jaýapty ustazy Hursan Berdimuratov júrgizdi. Semınar barysynda Ramazan aıyna rýhanı daıyndyq máselesi keńinen qozǵaldy. Ustaz orazanyń tek iship-jeýden tyıylý ǵana emes, eń aldymen júrek pen nıetti tazartý, qulshylyq-ǵıbadatty arttyrý aıy ekenin atap ótti. Sonymen qatar, oraza ustaǵan musylmannyń ózge adamǵa tilimen de, is-áreketimen de qııanat jasamaýy kerektigi, sabyr men kórkem minezdi saqtaý – orazanyń basty sharttarynyń biri ekeni túsindirildi.
Kezdesý barysynda qaıyrymdylyqtyń mańyzdylyǵyna erekshe nazar aýdaryldy. Jamaǵatqa qasıetti aıda qoldan kelgenshe kóbirek saýapty is jasap, muqtaj jandarǵa qol ushyn sozý qajettigi aıtyldy. Aýyzashar berý, zeket, pitir jáne fıdıa sadaqalary týraly sharıǵı túsinik berilip, olardyń tártibi men mańyzy jan-jaqty túsindirildi.
