«KÓKTAL» MEShITINDE JAMAǴAT ARASYNDA VIKTORINALYQ OIYN UIYMDASTYRYLDY (FOTO)

«Kóktal» meshitinde jamaǵat arasynda vıktorınalyq oıyn ótkizildi. Tanymdyq is-shara meshittiń Jastar sektorynyń uıymdastyrýymen «Meniń alǵashqy orazam» taqyryby aıasynda ótti.

Qasıetti Ramazan aıy – musylmandar úshin rýhanı tazarý, bilimin arttyrý jáne bir-birimen jaqyndasatyn erekshe kezeń. Osy ıgi aıda meshit jamaǵaty arasynda, ásirese alǵash ret oraza ustap júrgen jastar men jamaǵat múshelerin yntalandyrý maqsatynda tanymdyq vıktorınalyq oıyn uıymdastyryldy.

Is-sharanyń basty maqsaty – Ramazan aıynyń mańyzyn túsindirý, dinı bilimdi arttyrý jáne jamaǵat arasyndaǵy baýyrmaldyqty nyǵaıtý boldy. Vıktorınalyq oıyn barysynda qatysýshylarǵa oraza, ıslam ádepteri, paıǵambarlar tarıhy jáne jalpy dinı tanymǵa qatysty túrli suraqtar qoıyldy.

Qatysýshylar belsendilik tanytyp, suraqtarǵa jaýap berý arqyly óz bilimderin synady. Is-shara sońynda belsendi qatysqan jamaǵat múshelerine arnaıy syılyqtar tabystaldy.