«Kóktal» meshitiniń jamaǵaty ALJIR memorıaldy keshenine zııarat jasady

7 mamyr kúni «Kóktal» meshitiniń Jastar isi sektorynyń uıymdastyrýymen meshit jamaǵaty men shákirtteri ALJIR memorıaldy-murajaı keshenine zııarat jasady. Is-sharaǵa meshit ustazy Berdimuratov Hýrsan jetekshilik etti.

Zııarat barysynda qatysýshylar HH ǵasyrdaǵy saıası qýǵyn-súrgin qurbandarynyń taǵdyrymen tanysyp, tarıhı orynnyń mańyzy jóninde málimet aldy. ALJIR lageri 1937–1938 jyldary «halyq jaýy» dep aıyptalǵan azamattardyń jubaılary qamalǵan oryn retinde tarıhta qalǵany aıtyldy.

Memorıaldy keshende jazyqsyz japa shekken bozdaqtardyń rýhyna Quran baǵyshtalyp, arnaıy duǵa jasaldy. Sonymen qatar ótken tarıhtan taǵylym alý, el birligi men táýelsizdiktiń qadirin bilý jaıynda nasıhat aıtyldy.

Jıyn sońynda qatysýshylar qýǵyn-súrgin qurbandarynyń rýhyna taǵzym etip, el amandyǵy men jurt tynyshtyǵyna duǵa tiledi.