Kóshe tazalyqshylaryna ystyq tamaq berilip, jumystaryna qolǵabys jasaldy (FOTO)

07 aqpan 2019 714 0
Оqý rejımi

Aqpannyń aqyrǵan aıazy men bet qaratpas borany kún sanap kúsheıgen saıyn, QMDB Astana qalasy ókildiginiń bastamasymen iske qosylǵan «Astana – meıirimdi qala» jobasyna atsalysýǵa asyqqan jamaǵattyń da sany artyp keledi. Birneshe kún boıy Astana meshitteriniń qyzmetkerleri men jamaǵatty jumyldyrý arqasynda tegin taksı qyzmeti qosylyp, jolda qalǵan júrginshilerge kómek kórsetilýde.

Budan bólek, Astana meshitteriniń uıymdastyrýymen birneshe márte kóshe tazalyqshylaryna ystyq tamaq taratylyp, júrekterge jylý syılaǵan shara ótkizilgen bolatyn. Aıta keteıik, ıgilikti bastamany Astana qalasyndaǵy barlyq qulshylyq ordalary ilip áketip, keshegi kúnge deıin 200-ge jýyq qoǵamdyq jumysyshlarǵa ystyq tamaq berilip, qamqorlyq jasalǵan bolatyn.

Búgin respýblıkalyq «Áziret Sultan» meshitiniń qyzmetkerleri osy sharany taǵy da jandandyryp, qala kóshelerin aralap qaıtty. Arnaıy kólikpen ystyq shaı pen tamaq jetkizgen meshit qyzmetkerleri kóshe tazalyqshylary tamaqtanyp jatqan kezde qoldaryna kúrekterin alyp, jumystaryna qolǵabys jasady.

Aıta keteıik, «Astana – meıirimdi qala» jobasy aıasyndaǵy ystyq tamaq taratý sharasy búgin Elordamyzdaǵy tórt meshitte uıymdastyrylyp, jalpy sany 120 jumysshyny qamtý josparlanǵan.

Sýretterdi «FOTOGALEREIa» aıdarynan kóre alasyzdar!

Pіkіrler Kіrý