MAŃǴYSTAÝDA JAŃA MEShIT AShYLDY (FOTO)

Búgin, qasıetti juma kúni Mańǵystaý oblysynyń Munaıly aýdanynda Ábý molda atyndaǵy meshit ashylyp, jamaǵat ıgiligine berildi.

Dáýlet aýylynda boı kótergen meshittiń ashylý rásimine QMDB Dinı bilim jáne kadr daıarlaý bóliminiń meńgerýshisi Smaıyl Súıerqululy jáne «Ýaqyp» qorynyń basqarma tóraǵasy Ardaq Núsiphanuly arnaıy qatysyp, ıgi tilekterin bildirdi. Sondaı-aq jańa meshittiń ashylý saltanatynda oblys bas ımamy Ánýar Izimbaıuly, memleket jáne qoǵam qaıratkerleri, aqsaqaldar sóz sóılep, bata berdi.

Meshitke Bas múftı buıryǵymen ımam qyzmetine Berik Jyńǵylbaıuly taǵaıyndaldy. Buǵan deıin,Qyzyltóbe-2 aýyldyq Mustafa meshitinde ustazdyq qyzmet etken ımamdy oblys bas ımamy jınalǵan  jamaǵatqa tanystyryp, eńbegine bereke tiledi. Ánýar Izimbaıuly  óz quttyqtaýynda Bas múftı Naýryzbaı qajy Taǵanuly hazrettiń ystyq yqylasy men sálemin jetkizdi

Aıta keteıik,»Ábý molda»  meshiti  Munaıly aýdanyndaǵy  ashylǵan jetinshi meshit. Jýyrda  Munaıly aýdandyq Batyr aýylynan salynyp jatqan segizinshi meshit qurylysy aıaqtalyp, el ıgiligine beriledi dep josparlanýda.

​