Máskeý qalasynda xv halal halyqaralyq kongresi ótýde
Qazaqstan musylmandary dinı basqarmasy Tóraǵasy, Bas múftı Naýryzbaı qajy Taǵanulynyń tapsyrmasymen «Halal Damý» JShS dırektory Aıbek Asqarbekuly jáne atalmysh mekemeniń tehnology Nurbek Qanatuly Reseı Federatsııasynyń Máskeý qalasynda ótip jatqan XV Halal halyqaralyq kongresine arnaıy qatysýda.
Atalǵan halyqaralyq kongress 2026 jylǵy 10 aqpanda Máskeý qalasyndaǵy «Krokýs Ekspo» halyqaralyq kórme ortalyǵynda «Halal – ósý joly!» uranymen ashylyp, Eýropadaǵy eń iri «ProdEkspo–2026» halyqaralyq azyq-túlik, sýsyndar jáne óndiristik shıkizat kórmesi aıasynda ótýde.
Halyqaralyq shara barysynda Reseı musylmandary dinı basqarmasynyń halal sertıfıkattaý jáne standarttaý ortalyǵy tarapynan «Halal ortalyǵy» ashyldy. Saltanatty jıynda «Halal Damý» dırektory Aıbek Asqarbekuly Qazaqstan musylmandary dinı basqarmasy atynan sóz sóılep, Bas múftı Naýryzbaı qajy Taǵanulynyń sálemin jetkizdi.
Kongress jumysyna Reseı Federatsııasy musylmandary dinı basqarmasy, Reseı Federatsııasynyń Aýyl sharýashylyǵy mınıstrligi, Reseı Eksport ortalyǵy, Rosakkredıtatsııa, Rosstandart, sondaı-aq Malaızııa, Saýd Arabııasy, BAÁ, Marokko, Indonezııa, Aljır jáne Ońtústik Afrıka elderiniń resmı ókilderi qatysýda. Sonymen qatar halal ónimderin óndirý jáne Eksporttaý salasynda jetekshi oryn alatyn iri kompanııalar, ǵylymı-zertteý uıymdary men halyqaralyq sarapshylar óz tájirıbelerimen bólisýde.
Kongress barysynda halal ındýstrııasyn damytý, halal ónimderiniń Eksporttyq áleýetin arttyrý, halyqaralyq standarttardy úılestirý, ǵylymı jáne saraptamalyq qaýymdastyqtyń rólin kúsheıtý, sondaı-aq postkeńestik keńistiktegi halal uıymdarynyń ózara yntymaqtastyǵyn damytý máseleleri jan-jaqty talqylanýda.
Is-shara aıasynda «Halal Damý» dırektory Aıbek Asqarbekuly Qazaqstandaǵy halal ındýstrııasynyń damýy, ulttyq standarttaý júıesiniń erekshelikteri jáne halyqaralyq yntymaqtastyq baǵytyndaǵy jumystar týraly baıandama jasap, elimizdiń tájirıbesin halyqaralyq deńgeıde tanystyrdy.
Aıta keteıik, halyqaralyq mańyzdy sharaǵa 20 memleketten myńǵa jýyq kásiporyn qatysýda sondaı-aq, QMDB Halal sertıfıkatyn alǵan 4 kásiporyn óz ónimderin usynýda. Atalǵan shara tórt kúnge jalǵasady dep josparlanýda.
