MÁÝLIT AIY MÚBÁRAK BOLSYN!
Naýryzbaı qajy TAǴANULY,
QMDB Tóraǵasy, Bas múftı
Qurmetti musylman qaýym! Qadirli otandastar!
Barshańyzdy ardaqty Paıǵambarymyz Muhammedtiń (oǵan Allanyń salaýaty men sálemi bolsyn) dúnıege kelgen aıy qasıetti Máýlit merekesimen shyn júrekten quttyqtaımyn! Árbir otbasyǵa baq pen bereke, ıgililik pen birlik tileımin! Alla Taǵala siz ben bizdi ózine laıyqty qul, Paıǵambarymyz Muhammedke (oǵan Allanyń salaýaty men sálemi bolsyn) laıyqty úmbet bolýdy násip etkeı! Ámın!
Máýlit aıy – Alla elshisiniń (oǵan Allanyń salaýaty men sálemi bolsyn) ónegeli ómirin, saýapqa toly súnnet amaldaryn halyqqa nasıhattaýdyń, dinimizdiń asyl qundylyqtaryn dáripteýdiń taptyrmas múmkindigi. Bul aıda meshitterde Allaǵa madaq, Paıǵambarymyzǵa salaýat aıtylyp, máýlit jyry oqylady.
Paıǵambarǵa (oǵan Allanyń salaýaty men sálemi bolsyn) salaýat aıtý – saýapqa kenelý amaly. Musylman balasy Allaǵa madaq aıtýmen qatar, Onyń Paıǵambaryna (oǵan Allanyń salaýaty men sálemi bolsyn) sálem joldaıdy. Alla Taǵala Quranda: «Rasynda, Alla jáne Onyń perishteleri Paıǵambarǵa salaýat aıtady. Ýa, ıman keltirgender! Sender de oǵan salaýat aıtyp, sálem joldańdar» («Ahzab» súresi, 56-aıat) dep ámir etken. Al ardaqty Paıǵambarymyz (oǵan Allanyń salaýaty men sálemi bolsyn): «Kim maǵan bir salaýat aıtsa, Alla Taǵala oǵan on salaýat aıtady» degen.
Taǵy bir hadıste: «Kim maǵan bir salaýat aıtsa, oǵan Alla on salaýat aıtady jáne onyń on qateligin keshiredi ári onyń dárejesin on esege kóteredi» delingen. Biz bul hadısten salaýat aıtqan adam ózine jaqsylyq jasaǵanmen teń ekenin túsinemiz. Sebebi, biz salaýat aıtý arqyly Allanyń bizge salaýat aıtýyna jáne bes kún jalǵanda bilip-bilmeı istegen qate-kemshilikterimiz ben kúnálarymyzdyń keshirilýine, sonymen qatar dárejemizdiń on ese kóterilýine sebepshi bolamyz.
Búkil álemge meıirim, úlgi-ónege retinde jiberilgen Paıǵambarymyzdyń (oǵan Allanyń salaýaty men sálemi bolsyn) súnnetin jańǵyrtý – saýapty amaldyń biri. Alla Taǵala barshamyzǵa ul-qyzdarymyz ben urpaqtarymyzǵa úlgi bolar ónegeli ómir násip etsin! Ámın!
