MÁÝLIT KEShINDE KÓPBALALY OTBASYǴA PÁTER TABYSTALDY

Astana qalasynda ótken «Adaldyq – Paıǵambar (ﷺ) ósıeti» atty rýhanı máýlit keshi aıasynda kópbalaly otbasyna baspana kilti tabystaldy.

Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly jeti balanyń anasy Aıgúl Temirhanovaǵa jańa baspananyń kiltin saltanatty túrde tabystady.

Aıgúl Temirhanova – asyraýshysy joq, áleýmettik turǵydan az qamtylǵan, jeke baspanasy bolmaǵan kópbalaly ana. Igi bastama otbasynyń áleýmettik jaǵdaıyn jaqsartýǵa jáne baspanaly bolýyna múmkindik berdi.

Qaıyrymdylyq sharasy QMDB-nyń «El úlesi – páterge» jobasy aıasynda júzege asty. Osylaısha, Máýlit keshinde atalǵan joba boıynsha 917-shi baspana óz ıelerine tabystaldy.

Sonymen qatar, rýhanı kesh barysynda kópbalaly otbasyǵa 500 myń teńge kóleminde Máýlit syılyǵy tartý etildi.

Aıta keteıik, QMDB Zeket jáne qaıyrymdylyq qorynyń uıymdastyrýymen «El úlesi – páterge» jobasy áleýmettik jaǵdaıy tómen, baspanasyz jáne kómekke muqtaj otbasylarǵa qoldaý kórsetip keledi.