MÁÝLIT KEShINDE JAŃA KITAPTARDYŃ TUSAÝKESERI ÓTTI
Astana qalasynda «Adaldyq – Paıǵambar (ﷺ) ósıeti» atty rýhanı Máýlit keshi aıasynda «Múftııat» baspasynan jaryq kórgen bes jańa kitaptyń tusaýkeser rásimi ótti.
Atap aıtqanda,«Máýlitti atap ótýdiń sharıǵı dálelderi», «Paıǵambarymyzdyń balalyq shaǵy», « Islam jáne Adal qoǵam», «Ájemniń nasıhaty», «Juma ýaǵyzy» (6 tom) atty eńbekter kópshilik nazaryna usynyldy.
Saltanatty tusaýkeser rásimine Bas múftı Naýryzbaı qajy Taǵanulymen birge halyq qaharmany, general Baqytjan Ertaev, memleket jáne qoǵam qaıratkerleri Jabal Erǵalıev, Álıhan Baımenov, QR Din isteri komıtetiniń tóraǵa orynbasary Maqsat Ramanqulov jańa kitaptardyń tusaýyn kesti.
Alǵashqy kitap – «Paıǵambarymyz Muhammedtiń máýlitin atap ótýdiń sharıǵı dálelderi».
Bul eńbekte Paıǵambarymyzdyń dúnıege kelýi, ómirbaıanyna qatysty tarıhı derekter jáne máýlitti atap ótýdiń sharıǵattaǵy orny qarastyrylady. Quran aıattary, sahıh hadıster, sahabalar men tabıǵınderdiń sózderi jáne ıslam ǵalymdarynyń eńbekteri negizinde máýlittiń máni men oǵan qatysty sharıǵı dálelder taldanǵan.
Kelesi kitap – «Muhammed Paıǵambardyń balalyq shaǵy».
Bul kitap jas oqyrmandarǵa arnalǵan, ardaqty Paıǵambarymyzdyń balalyq shaǵyndaǵy taǵylymdy oqıǵalardy baıandaıdy. Onyń boıyndaǵy sabyrlylyq, meıirimdilik, ádildik, qaıyrymdylyq, sypaıylyq pen kishipeıildilik sekildi asyl qasıetter jas urpaqqa úlgi retinde usynylady.
Paıǵambarymyzdyń ómirin bala kezinen tanyǵan urpaq onyń kórkem minezin júregine sińirip ósetini sózsiz.
Al «Ájemniń nasıhaty» atty úshinshi kitapta urpaq tárbıesi men ulttyq-adamgershilik qundylyqtar keńinen qamtylǵan.
Úlkendi syılaý, kishige izet kórsetý, adal eńbek etý, bilimge umtylý, baýyrmaldyq pen meıirimdilik – Islam dini de, halqymyzdyń dástúrli tárbıesi de joǵary baǵalaǵan qasıetter.
Bul kitap jas urpaqty ata-baba murasyn qadirleýge, otbasy qundylyqtaryn qasterleýge jáne adamgershilik jolyn berik ustanýǵa úndeıdi.
Tórtinshi kitap – «Islam jáne adal qoǵam».
Adaldyq – musylmannyń kórkem mineziniń negizi ári qoǵamnyń berik irgetasy. Bul eńbekte Quran Kárim men Paıǵambarymyzdyń súnneti negizinde adaldyq uǵymy, ımandylyq, kórkem minez, otbasy qundylyqtary jáne qoǵam aldyndaǵy jaýapkershilik máseleleri baıandalady.
Sonymen qatar bul kitap Qazaqstan musylmandary dinı basqarmasynyń «Islam jáne adal qoǵam» jyly aıasynda Bas Múftı Naýryzbaı qajy Taǵanuly Hazirettiń avtorlyǵymen jaryqqa shyǵyp otyr.
Al besinshi kitap – «Juma ýaǵyzy» jınaǵynyń VI tomy.
Bul jınaqqa elimizdiń barlyq meshitterinde 2025 jyly juma ýaǵyzdarynda aıtylǵan taqyryptar engizilgen. Quran aıattary men Paıǵambarymyzdyń hadısteri, ǵalymdardyń taǵylymdy ósıetteri, aqyn-jyraýlarymyzdyń naqyl sózderi men halqymyzdyń danalyq oılary qamtylǵan.
Aıta keteıik, Bas múftıdiń bastamasymen 2020 jyly «Múftııat» baspasy qurylyp, osy ýaqytqa deıin musylman qaýymynyń dinı saýatyn arttyrýǵa jáne rýhanı qajettiligin óteýge baǵyttalǵan kitaptar jaryq kórip keledi.
