MEDRESE USTAZDARYNA JALAQY, STÝDENTTERGE ShÁKIRTAQY BERILÝDE (FOTO)
Bas múftı Naýryzbaı qajy Taǵanuly din qyzmetkerlerine joldaǵan baǵdarlyq baıandamasynda 2023 jyly QMDB Ortalyq Apparatynan 100 adamǵa jalaqy tólenetini jóninde málimdegen edi. Dinı basqarma Tóraǵasynyń sheshimimen medrese-kolledj ustazdaryna qosymsha jalaqy, al úzdik stýdentterge shákirtaqy berilýde.
Bul týraly Dinı bilim jáne kadr daıarlaý bóliminiń meńgerýshisi Smaıyl Seıtbekov habarlady.
«Bas múftı Naýryzbaı qajy Taǵanuly baǵdarlyq baıandamasynda 2022 jyly QMDB Ortalyq Apparatynan elimizdegi 200 din qyzmetkerine jalaqy tólengenin, bul kórsetkishtiń bıyl taǵy 100 adamǵa kóbeıetinin, sondaı-aq jalaqy alatyn qyzmetkerler arasynda medrese ustazdary da bolatynyn atap ótken bolatyn. Osy oraıda dinı qyzmet pen bolashaq mamandardyń bilim sapasyn arttyrý maqsatynda biryńǵaı medrese-kolledj ustazdaryna qosymsha jalaqy tóleý jóninde Bas múftıge usynys jasadyq. QMDB Tóraǵasy usynysymyzdy qabyl alyp, elimizdegi 9 medrese-kolledjdiń 132 arnaıy dinı pán ustazyna qosymsha jalaqy, al 200 úzdik stýdentke alǵash ret shákirtaqy taǵaıyndaldy. Medrese ustazdaryna qańtar aıynan bastap, jyl boıy qosymsha jalaqy berilse, 200 úzdik stýdentke oqý jyly barysynda, ıaǵnı 9 aı shákirtaqy beriledi» dedi bólim meńgerýshisi.
