MEMLEKET BASShYSY ÁL-AZHAR ShEIHY AHMET TAIYPPEN KEZDESTI
Memleket basshysy Qasym-Jomart Toqaev «Ál-Azhar» ýnıversıtetiniń Joǵarǵy ımamy, sheıh Ahmet Taıyppen kezdesti. Bul týraly Aqordanyń baspasóz qyzmeti habarlady.
El Prezıdenti Álemdik jáne dástúrli dinder kóshbasshylarynyń basqosýyna oraı joldaǵan shaqyrýyn qabyl alǵany úshin sheıh Ahmet Taıypqa rızashylyq bildirdi.
– Biz ózińiz basqaratyn «Ál-Azhar» ýnıversıtetin ortaq dinimiz – ıslam qundylyqtaryn dáripteýshi «shamshyraq» retinde qarastyramyz. Sondyqtan toleranttyq pen ustamdylyqty, sabyrlyq pen meıirimdilikti tý etken ortalyq ǵulamalarynyń búgingi Álemdik jáne dástúrli dinder kóshbasshylarynyń basqosýyna qatysýy biz úshin óte mańyzdy, – dedi Prezıdent.
Qasym-Jomart Toqaev mártebeli meımanǵa ıslam biliminiń ordasy jáne dinı Ekstremızmge qarsy is-qımyl ortalyǵy sanalatyn «Ál-Azhar» ýnıversıtetinde qazaqstandyq stýdentterdiń bilim alýyna jasalǵan jaǵdaıdy joǵary baǵalaıtynyn jetkizdi. Sonymen qatar «Ál-Azhardyń» Qazaqstanda ıslam bilimi men zertteýleriniń damýyna qomaqty úles qosyp otyrǵanyn erekshe atap ótti.
Kelesi jyly sultan Beıbarystyń týǵanyna 800 jyl tolady. Memleket basshysy atalǵan mereıtoıǵa daıyndyq aıasynda Qazaqstan tarapy Kaırdegi sultan Beıbarys meshitin qaıta jóndeýge aıtarlyqtaı úlesin qosatynyn aıtty.
Kezdesý sońynda Qasym-Jomart Toqaev Mysyr Prezıdenti Ábdel Fattah as-Sısıge ystyq yqylasqa toly sálemin joldady.
Óz kezeginde «Ál-Azhardyń» Joǵarǵy ımamy Memleket basshysyna Mysyr Prezıdentiniń júrekjardy sálemin jetkizdi.
