MEMLEKET BASShYSY RAMAZAN AIYMEN QUTTYQTADY

Qazaqstan Respýblıkasynyń Prezıdenti Qasym-Jomart Toqaev qazaq elin kúlli musylman qaýymynyń saǵyna kútetin merekesi Ramazan aıymen quttyqtady. Memleket basshysynyń quttyqtaýy Aqordanyń resmı saıtynda jarııalandy.

«Qurmetti otandastar! Sizderdi kúlli musylman qaýymy úshin qasıetti Ramazan aıynyń bastalýymen shyn júrekten quttyqtaımyn!

Bul – dúnıe júzindegi mıllıardtaǵan jandy rýhanı tazarýǵa, jaqynyna janashyr ári qamqor bolýǵa úndeıtin mezgil.

Oraza azamattardy shydamdylyq pen tózimdilikke shaqyryp, halqymyzdyń boıyna qarapaıymdylyq, jaýapkershilik jáne adaldyq syndy asyl qasıetterdi sińiredi.

Orazanyń rýhanı qundylyqtaryn qazir álemde bolyp jatqan kúrdeli ahýaldy eskere otyryp, kemel sanamen qabyldaý, onyń túpki maǵynasyn durys túsiný – úlken ımandylyqtyń belgisi.

Búginde Qazaqstan aýqymdy ózgeristerdiń, túbegeıli jańǵyrýdyń tarıhı kezeńine qadam basty. Jańa halyqtyq Konstıtýtsııanyń jobasy respýblıkalyq referendýmǵa shyǵaryldy. Bul órleý jáne ádilettilik dańǵylyna túsken memleketimizdiń damý baǵytyn aıqyndaıtyn Negizgi Zań bolmaq. Bas qujat myńdaǵan jyl tarıhy bar memlekettiligimizdi odan ári nyǵaıtýǵa, elimizdegi saıası, azamattyq, Ekonomıkalyq ınstıtýttardyń tıimdiligin arttyrýǵa jáne adam quqyqtaryn qorǵaý júıesin jetildirip, kúsheıtýge jol ashady.

Biz dástúrli rýhanı-mádenı qundylyqtarymyzdy qasterleı otyryp, Quqyq pen Zań ústemdigi, Tártip pen Tazalyq, Ádildik pen Otanshyldyq sııaqty myzǵymas qaǵıdattardy tereń túsinetin ári múltiksiz saqtaıtyn ulttyń jańa bolmysyn qalyptastyryp jatyrmyz. Munyń bári qasıetti Ramazan aıynyń máńgilik ulaǵatymen tolyq úndesedi.

Bilimge, tazalyqqa jáne jaqsylyqqa bastaıtyn órkenıetti qoǵamda Ramazan aıy jańa rýhanı mánge ıe bolyp, barsha jurtqa shapaǵatyn tıgizetini sózsiz.

Qasıetti Ramazan qutty bolsyn, musylman jamaǵaty!» delingen Prezıdent quttyqtaýynda.