Memlekettik hatshy Aqsaqaldar forýmyna ıgi tilegin joldady (FOTO)

Elordada Qazaqstan musylmandary dinı basqarmasynyń uıymdastyrýymen ótip jatqan «Qarııalar – el qazynasy» I respýblıkalyq aqsaqaldar forýmyna QR Memlekettik hatshysy Erlan Qarın arnaıy hat joldady. Hatty QR Memlekettik hatshysy Hatshylyǵy meńgerýshisiniń orynbasary Erjan Baıtiles oqyp berdi.

«Búgingi jıynǵa qatysyp otyrǵan aqsaqaldarymyzdyń barlyǵy Táýelsiz Qazaqstannyń qalyptasýyna zor úles qosty. Sizderdiń ómirlik tájirıbelerińiz ben kórgen-bilgenderińiz jastardyń ultjandy, memleketshil bolyp ósýine yqpal etedi.

Osy oraıda Qazaqstan musylmandary dinı basqarmasy janynan eldiń aldynda, kóshtiń basynda júrgen ózderińizdeı aqsaqaldardan keńes qurylǵany quptarlyq bastama. Endi osy úrdis eldiń ortalyǵymen ǵana shektelip qalmaı, oblys, aýdan, aýyldarda da jalǵasyn tabýy kerek. Bul eldiń birligin arttyryp, yntymaǵyn eseleı túsedi dep senemin.

Búgingi forým jumysyna sáttilik tileımin. Elimiz aman, jurtymyz tynysh bolsyn!» delingen Memlekettik hatshynyń hatynda.