Meshit qyzmetkerine Bas múftı atynan «Alǵys hat» tabystaldy (FOTO)

Nur-Sultan qalasyndaǵy «Sádýaqas Ǵylmanı» meshitinde qyzmet atqaratyn Nagrad aǵamyzdy bilmeıtin jamaǵat joq shyǵar. Qashan kórseńiz, qolyna taıaǵyn syǵymdaı ustap, qulshylyq ordasynyń kem-ketigin jóndep, jyrtyǵyn jamap kele jatqan Nagrad Álenhanuly osy meshittiń sharýashylyq meńgerýshisi, is basqarýshysy qyzmetterine attaı 23 jylyn jumsaǵan eken.

Shırek ǵasyrǵa jýyq ýaqyt boıy Alla úıiniń abyroıyn aqtap, qarashyǵyndaı aıalap kele jatqan aǵamyzdyń eresen eńbegin eskergen Dinı basqarma basshylyǵy Nagrad Álenhanulyna búgin arnaıy «Alǵys hat» tabystady. Eńbegi janǵan bilikti qyzmetkerdi QMDB tóraǵasynyń birinshi orynbasary, naıb múftı Naýryzbaı qajy Taǵanuly qabyldap, arnaıy kezdesý ótkizdi. Kezdesý barysynda Nagrad Álenhanulynyń qulshylyq ordasyna sińirgen súbeli eńbegin, jaqynda ashylǵan QMDB ǵımaratynyń jumystaryna qosqan qajyrly úlesin erekshe atap ótken Naýryzbaı qajy Taǵanuly iltıpatyn bildirip, Bas múftı «Alǵys hatyn» tabys etti.