Myrzataı Joldasbekov: Jańa kitap janymdy jadyratty (FOTO)
Bas múftı Naýryzbaı qajy Taǵanulynyń jetekshiligimen QMDB ǵımaratynda ótken «Ihsan – tárbıe negizi» kitabynyń tusaýkeserinde jıynnyń qurmetti qonaqtary – el aǵalary qundy eńbektiń jaryq kórýimen quttyqtap, Dinı basqarmanyń ıgi bastamalaryna jyly lebiz bildirdi.
«Búgin tusaýy kesilip otyrǵan «Ihsan – tárbıe negizi» kitabynyń elimizdiń Tuńǵysh Prezıdenti – Elbasy Nursultan Nazarbaevtyń «Bolashaqqa baǵdar: rýhanı jańǵyrý» maqalasymen úndes, rýhtas ekenin kórdim. Keıingi jyldary Qazaqstan musylmandary dinı basqarmasynyń tikeleı atsalysýymen din men salt-dástúr sabaqtastyǵy týraly kókeıge qonatyn kitaptar kóptep shyǵyp jatyr. Bul óte quptarlyq, qýanarlyq jaǵdaı.
Dinı basqarmanyń negizgi mindetiniń biri – musylman tárbıesin berý. Osy rette aıtatynym, múftııat óz mindetin oıdaǵydaı atqaryp keledi. Onyń jarqyn mysalynyń biri – qolymyzǵa tıgen «Ihsan – tárbıe negizi» kitaby. Bul kitap adam balasyn tárbıeleýge, Hákim Abaı aıtqan «Tolyq adam» kontseptsııasyna negizdelgen» dep atap ótti Myrzataı Joldasbekov.
Aıta keteıik, «Ihsan – tárbıe negizi» kitabynda «Jaratýshy Allaǵa ıhsan», «Tulǵalyq ıhsan», «Ihsan jáne qoǵam» syndy taraýlar qamtylyp, Islam ǵulamalarynyń ıhsan ilimi jaıly oı-tolǵamdary berilgen.
