Naıb múftı aqtóbelik jamaǵatpen kezdesti (FOTO)
Keshe QMDB-nyń Tóraǵa orynbasary, naıb múftıi Ádilbaev Alaý Shaıqymuly Aqtóbe oblystyq ortalyq «Nur-Ǵasyr» meshitinde jamaǵatpen kezdesip, duǵa jasaý taqyrybynda ýaǵyz aıtty. Naıb múftı musylmannyń qarýy duǵa ekendigi jóninde sóz qozǵap, Alladan suraýdan jalyqpaý, duǵa jasaýda sarańdyq tanytpaý taqyryptaryn tarqatty. Sondaı-aq, aldaǵy kele jatqan qasıetti Ramazan aıyna rýhanı turǵyda qandaı daıyndyqtar jasaý kerektigi jóninde mazmundy áńgime órbitti.
Esterińizge sala keteıik, Aqtóbe qalasyna QMDB-nyń arnaıy qurylǵan komıssııasyn bastap kelgen naıb múftı A.Ádilbaev keshe oblys kólemindegi meshit ımamdarynan attestatsııa alǵan bolatyn. Meshittiń mýzeı zalynda ótken saraptaý-attestatsııasyna qaladan jáne aýdandardan barlyǵy 104 ımam qatysty. Din qyzmetkerleriniń QR Konstıtýtsııasy, Islam tarıhy, Fıqh, aqıda, QMDB-nyń basty 4 qujaty boıynsha bilimderi men biliktiligi saralandy.
Búgin Jastar jyly jáne Aqtóbe qalasynyń 150 jyldyǵyna oraı, «Nur Ǵasyr» meshitiniń úlken zalynda jas jamaǵat arasynda ótetin «150 jyldyqqa – 150 suraq» atty zııatkerlik saıysqa QMDB-nyń Tóraǵa orynbasary Alaý Shaıqymuly qazylyq etedi dep kútilýde.
